Amerika ku isonga mu kugira abarwayi benshi ba coronavirus

Amerika ifite abarwayi benshi kurusha ibindi bihugu byose byo ku Isi aho ifite 82,621 bamaze kuyandura naho abamaze guhitanwa nayo akaba ari 1,184. Ikurikirwa n'u Butaliyani buri ku isonga mu kugira abantu benshi bahitanwe na covid-19 kuko bufite abagera kuri 34.4% by'abamaze guhitanwa n'iki cyorezo ku Isi hose.

Amerika niramuka idahinduye ingamba biraza kurangira ishegejwe cyane dore ko tariki 26 Werurwe 2020 handuye abagera ku 14,401 ku munsi umwe, hapfa abagera kuri 157 kandi iyi mibare ni yo tuba dufashe turi kwandika iyi nkuru kuko buri mwanya haboneka abandi.

Igihugu kigwa mu ntege Amerika mu kugira abarwayi ba COVID-19 benshi ni Ubutaliyani bukaba ubwa mbere mu kugira benshi bahitanwe n'iki cyorezo. Ubu abagera kuri 80,589 bararwaye naho abagera kuri 8,215 cyarabahitanye bangana na 34.4% by'abamaze guhitanwa n'iki cyorezo ku Isi. 

Ubushinwa buza ku mwanya wa kabiri mu kugira abarwayi benshi aho bufite abagera kuri 81,285 cyikaba kiri ku mwanya wa 2 mu kugira abantu bahitanwe n'iki cyorezo bagera ku 3,287. Gusa u Bushinwa ubu nta bwandu bushya bukiri kuhagaragara.

Ibihugu byigeze gushegeshwa n'iki cyorezo mu maza yacyo ariko ubu bikaba bimaze kugera kure mu kugihashya kuko nta bwandu bushya bukiri kuhagaragara ku isonga hari Ubushinwa. Ibanga rihari ryakoreshweje ni uko iki gihugu cyahagaritse ibintu byinshi ndetse kigakumira abantu kongera guhurira mu ruhame.

Afrika ni umugabane utarazahajwe cyane na coronavirus gusa ubukungu bwayo bwarahatikiriye. Ibihugu bifite abarwayi ba coronavirus ni 46, hamaze gupfa abagera kuri 72. Ibihugu biyoboye urutonde ni Afrika Y'Epfo ifite abarwayi bagera kuri 709 hagakurikiraho Egypt/Misiri ifite abarwayi bagera kuri 456. Abantu bamaze kwandura Covid-19 muri Africa hose barangana na 3041.   

Umubare w’abamaze guhitanwa n’iki cyorezo ku Isi urangana na 23,944, naho abagera kuri 528,263 bararwaye, abagera kuri 123,364 baravuwe barakira. Ibihugu bigera ku 198 ni byo iki cyorezo kimaze kugeramo.