Manchester United ibura abakinnyi 10 irakina na Liverpool itaratsindwa na rimwe muri uyu mwaka muri shampiyona y’u Bwongereza

Paul Pogba biravugwa ko ashobora kugaruka mu kibuga nyuma y'imikino 4 United izakina

Mu mpera z’iki cyumweru mu gihugu cy’u Bwongereza harakinwa umunsi wa 9 w’imikino muri Premier League, kuri ubu iyobowe na Liverpool imaze gutsinda imikino yose umunani imaze gukinwa muri uyu mwaka w’imikino, aho ifite amanota 24 yose. Manchester United yo bagiye gukina ihagaze nabi ku buryo n’umutoza Ole nawe ari mu mazi abira, kuko mu mikino umunani ya shampiyona imaze gukinwa muri uyu mwaka, yatsinze 2 anganya 3 atsindwa indi mikino 3, akaba afite amanota 9 kuri 24.

Manchester United ntiyifuza gutakaza umukino wo ku Cyumweru izakira ikipe ya Liverpool, kugira ngo bagarurire icyizere abafana b’iyi kipe izwi nk’amashitani atukura. Gusa ariko ubanza akazi katazoroha kubera ko imibare y’umutoza Ole igiye guhinduka nyuma y'uko abakinnyi 10 barimo n’inkingi za mwamba bafite ibibazo by’imvune bituma batazagaragara kuri uyu mukino.

Manchester yagize intangiriro mbi za shampiyona ugereranyije n'imyaka 30 ishize

Abakinnyi ba 10 Manchester United batazagaragara kuri uyu mukino kubera ikibazo cy’imvune ni: David de Gea, Luke Shaw, Aaron Wan-Bissaka, Paul Pogba, Anthony Martial, Jesse Lingard, Diogo Dalot, Eric Bailly, Phil Jones na Mason Greenwood.

De Gea ni umwe mu bakinnyi bafite imvune batazakina na Liverpool

Victor Nelson Lindelof nawe yari afite ikibazo mu minsi yashize ariko umutoza Ole Gunnar atangaza ko yagarutse mu kibuga kandi nagaragaza urwego rwiza ashobora kubanza mu kibuga iruhande rwa Maguire.

Abinyujije kuri Televiziyo ya  Manchester United umutoza Ole Gunnar Solskjaer yatangaje ko bitoroshye kubura De Gea na Pogba bose mu mukino ariko bazakora uko bashoboye bakihagararaho mu rugo, ikindi ni uko abakinnyi bose uko ari 10 bafite ibibazo ariko hagize ugaruka mu kibuga mbere y’umukino akagaruka ari ku rwego rwiza azitabazwa nta kabuza.

Umusaruro Mwiza Manchester United iwuheruka Ole ataragirwa umutoza mukuru, kubera ko nk’umutoza mukuru Ole yatoje imikino 21 atsinda 6, anganya 6, atsindwa imikino 9.

Muri uyu mwaka w’imikino wa 2019-2020 muri shampiyona y’u Bwongereza kuva yatangira uretse umukino ufungura shampiyona Manchester United yatsinzemo Chelsea ibitego 4-0, nta wundi mukino Manchester United yigeze itsinda ibitego birenze kimwe.

Umwanditsi – SAFARI Garcon – inyarwanda.com