Meddie Kagere yongereye amasezerano muri Simba SC

Nk’uko bigaragara ku rubuga rwa Twitter rwa Simba SC, Meddie Kagere yasinye amasezerano mashya y’umwaka umwe muri Simba SC, ikipe n’ubundi izakina imikino ya Total CAF Champions League 2019-2020 kuko yatwaye igikombe cya shampiyona 2018-2019.

Mu 2018 ubwo Meddie Kagere yageraga muri Simba SC yasinye amasezerano azamugeza mu 2020. Muri uyu mwaka wa 2019 yari asigajemo umwaka umwe bityo bahita bamwongera undi akomeza kuba umukinnyi wayo kuzageza mu 2021.

Meddie Kagere (Iburyo) ashyira umukono ku masezerano mashya ya Simba SC

Meddie Kagere w’imyaka 32 yafashije Simba SC gutwara igikombe cya shampiyona 2018-2019 basiga ikipe ya Yanga SC ndetse banagerana mu mikino y’amatsinda ya Total CAF Champions League 2018-2019.

Meddie Kagere yatsinze ibitego 23 muri shampiyona ya Tanzania 2018-2019 anaba umukinnyi watsinze ibitego byinshi muri rusange. Kagere yari umukinnyi uhenze unifuzwaga n’amakipe akomeye ku mugabane wa Afurika nka Zamalek yo mu Misiri ariko byarangiye asinyiye Simba SC ikipe akunzwemo cyane bitewe n’umusaruro abaha mu kibuga.

Meddie Kagere rutahizamu w’ikipe y’igihugu y’u Rwanda (Amavubi), yageze muri Simba SC mu 2018 avuye muri Gormahia FC yabayemo imyaka itatu (2015-2018). 

Kagere yageze muri Gormahia FC avuye muri KF Tirana muri Albania aho yakinnye umwaka umwe (2014-2015). 2013-2014, Meddie Kagere yari muri Rayon Sports ubwo yari yayigezemo avuye muri Police FC yakinnyemo mu 2010-2013.

Meddie Kagere yatsinze ibitego byinshi muri shampiyona 2018-2019 ya Tanzania (23) anaba umukinnyi mwiza w'umwaka 

2008-2009, Meddie yari muri Mukura VS ikipe yagezemo avuye muri Kiyovu Sport (2007-2008). Meddie Kagere yari muri Attraco ya 2006 ubwo yari avuye muri Mbale Heroes FC yakinnyemo imyaka ibiri (2004-2006).