UCC Gikondo yongeye gutegura igiterane cy’ububyutse kigiye kuba ku nshuro ya 8

Iki giterane kigiye kuba ku nshuro ya munani cyiswe ‘Revival conference‘ bisobanuye mu rurimi rw’ikinyarwanda ngo‘ Igiterane cy’ububyutse. Abakozi b’Imana batumiwe muri Revival Conference igiye kuba ku nshuro ya munani ni Apostle Charles Rwandamura, Bishop Margret Rwandamura, Pastor Emma Ntambara, Apotre Jane  Karamira, Pastor Pastor Thomas Mugema ndetse n’amatsinda aririmba indirimbo z’Imana nka Kingdom of God Ministries, Imigezi y’ubugingo Choir, Ijwi ry’ubuhanuzi (UCC Kabuga), Planet Shakers, UCC Gikondo Worship Team na Blessed Generation (UCC Niboye). 

Bishop Margret Rwandamura umushumba w’iri torero rya UCC Gikondo ari naho hazabera iki giterane yatangaje ko hari umusaruro ntagereranywa umaze kuva mu biterane birindwi bamaze gukora. Ati: "Umusaruro urahari, uragaragara ku mpande zombi. Twabonye abantu bakizwa bakava mu byaha, abandi Imana ibahindurira amateka, nko kubona akazi, Business zikaguka, abatabyara bakabona urubyaro, abarwayi bagakira indwara, ndetse n’Itorero rikaguka bitewe n’ububyutse.”

Bishop Margret Rwandamura hamwe n'umugabo we Apotre Rwandamura

Bishop Margret Rwandamura yakomeje avuga ko buri mwaka iki giterane baba bagihaye intego y’umwihariko ati:’Uyu mwaka wa 2018 twagihaye intego dusanga mu gitabo cya Yesaya 40:29-31 hagira hati:”Ni yo iha intege abarambiwe, kandi utibashije imwongeramo imbaraga, Abasore b’imigenda bazacogora baruhe, n’abasore bazagwa rwose, ariko abategereza Uwiteka bazasubizwamo intege nshya, bazatumbagira mu kirere bagurukishe amababa nk’ibisiga, baziruka be kunanirwa, bazagenda be gucogora.”

Yakomeje agira ati “Muri iki giterane tuzasenga Imana tuyisaba ko yaha abantu imbaraga ndetse tunayisaba ngo igarurire abantu bayo ibyo satani yabanyaze n’ibyariwe n’inzige byose ibigarure kandi turizera tudashidikanya ko Imana itazabura kwiyereka abazayishimira muri aya masengesho y’ububyutse."

Revival conference izatangira tariki ya 5 Kanama 2018, isoze ku cyumweru tariki 12 Kanama 2018 i Gikondo kuri UCC (United Christian Church Gikondo) mu kigo cy’ishuri ry’isumbuye [APAPE]. Iki giterane kizajya gitangira kuva ku Saa kumi z’umugoroba gisozwe saa moya n’igice z’ijoro [16h00 Pm -19:30 Pm).

Itorero UCC rifite amatorero hirya no hino aho muri Uganda rifite amatorero 434, rikagira andi muri Kenya na Tanzaniya. Mu Rwanda ngo hari amashami make muri yo akomeye ni atatu aho irihagarariye andi yose ari ryo UCC Niboye rya Kicukiro rihagarariwe na Apostle Rwandamura Charles, irya Gikondo riyoborwa n’umugore we Bishop Rwandamura Margret, n’irindi riherereye i Kabuga.

Igiterane cyateguwe na UCC Gikondo