‘Buri mukristo wese wa Zion Temple azaba umupasiteri’-Apotre Dr Gitwaza

Tariki 31 Ukwakira 2017 ni bwo Apotre Gitwaza yari mu Bwongereza. Ubwo yabwirizaga yavuze ko buri mukristo wese wa Zion Temple azaba umupasiteri. Apotre Gitwaza avuga umukristo wa Zion Temple azajya amara imyaka itanu mu itorero, ubundi akajya gutangiza minisiteri. Yavuze ko ibi yabikoze nyuma y'aho itorero ngo ryari rimubanye idini arireba, ibintu yatekerezaga ko bizaba atakiriho. Yashimangiye ko amakosa yabaye muri Zion Temple atazasubira ukundi. Yagize ati: 

Buri mukristo wese wa Zion Temple azaba umupasiteri, ni yo gahunda dufite, kuko Bibiliya iravuga ngo nabagize abami n’abatambyi. Ni yo mpamvu twazanye kaminuza, twayizanye ngo tubategure, hanyuma tubohereze (gutangiza amatorero). Buri mukristo wese waciye aha (Zion Temple) azabatizwa mu amazi menshi akorere Imana. Nibura tuzajya dutindana nawe imyaka itanu, tukureke nawe ube umugabo. (…) Amakosa twakoze ntazongera gukorwa, itorero ryari ridupfanye turi bazima, ryari ryahindutse idini, nabonaga Zion nkabona idini,nari nzi ko bizaba narapfuye, itorero ryambanye idini ndireba, abantu bakanzenguruka simenye ibibera hariya kandi byose bikitirirwa njyewe.

Apotre Gitwaza yavuze ko abo yasengeye akabasaba kujya gutangiza umurimo w'Imana hirya no hino muri Kigali ndetse bakajyana n'abakristo bo mu bice buri umwe yari agiyemo, ngo Imana yarabakoresheje cyane ndetse ntihaboneka icyuho muri Zion Temple mu Gatenga kuko abantu benshi bahise baza bajya mu myanya y'abari bagiye. Ibi asanga bikwiriye gukomeza, buri mukristo umaze gukura mu gakiza, akajya gutangiza itorero. Twabibutsa ko muri iyi minsi Apotre Dr Paul Gitwaza ari mu rugendo rw'ivugabutumwa aho ari kuzenguruka ibihugu bitandukanye ku isi yamamaza inkuru nziza ya Yesu Kristo. 

Apotre Gitwaza avuga ko buri mukristo wa Zion Temple azaba umupasiteri