Kuri uyu wa gatanu tariki 24 Mata 2015 I Zurich nibwo habereye tombola y’uko amakipe 4 asigaye mu irushanwa ry'amakipe yitwaye neza ku mugabane w'Uburayi, UEFA Champions League azahura muri ½. Iyi tombola ikaba yasize FC Barcelona izahura na FC Bayern Munich naho Real Madrid ihure na Juventus.
Imikino ibanza izaba ku matariki 5 niya 6 Gicurasi 2015 ,iyo kwishyura ibe nyuma y’icyumweru.Umutoza Pep Guardiola ikaba agomba guhangana n’ikipe yahoze atoza ya FC Barcelona.
Uku niko amakipe yatomboranye kuzahura muri 1/2 cy'irangiza
Mu mikino ya kimwe cya kane cy’irangiza, ikipe ya FC Barcelona yo muri Espagne yari yasezereye Paris Saint Germain yo mu Bufaransa ku kinyuranyo cy’ibitego(aggregate) 5 kuri 1 . Bayern Munich yo mu Budage bizahura yo yasezereye FC Porto yo muri Portugal ku kinyuranyo cy’ibitego 7 kuri 4. Ikizakomeza uyu mukino ni uko Pep Guardiola utoza FC Bayern Munich agiye guhura na FC Barcelona yahoze atoza ndetse akayihesha ibikombe byinshi , ayivamo muri 2012.
Chicharito watsinze igitego cyatumye Real Madrid igera muri 1/2 cy'irangiza
Ku rundi ruhande, ikipe ya Real Madrid nayo yo muri Espagne yasezereye Atletico Madrid bigoranye ku 1 -0 mu mikino yombi yatsindiwe na Javier Hernandez bakunda kwita Chicharito, izahura na Juventus de Turin yo mu Butaliyani nayo yasezereye Monaco yo mu Bufaransa ku gitego 1-0 mu mikino yombi.
Umutoza Pep Guardiola wa Bayern Munich ugiye kongera guhura n'ikipe yahoze atoza
Thomas Muller niwe uyoboye ba rutahizamu ba Bayern Munich n'ibitego 6 mbere y'uko bahura na FC Barcelona
Carlos Tevez niwe uyoboye ba rutahizamu ba Juventus n'ibitego 6
Critiano Ronaldo niwe ufite ibitego byinshi muri Real Madrid(8) mbere y'uko bahura na Juventus bahatanira kongera kwegukana igikombe cya Champions league begukanye umwaka ushize
Suarez, Neymar na Messi na Barcelona bafite akazi gakomeye ko gusezerera Bayern Munich
Kuva muri 2003 nibwo bwa mbere ikipe ya Juventus igize muri kimwe cya kabiri cy’igikombe cy’amakipe yitwaye neza iwayo ku mugabane w’Uburayi, Uefa Champions League. Mu mwaka wa 2013 ubwo ikipe ya FC Barcelona yahuraga na Bayern Munich, iyi kipe yavuyemo yandagaye cyane kuko Bayern yayitsinze ibitego 7-0 mu mikino yombi. Icyibazwa na benshi ni ukuntu iyi kipe izitwara imbere ya Bayern Munich noneho inafite uwari umutoza wayo kandi usobanukiwe neza imikinire yayo.
Umukino wanyuma wa UEFA Champions League uzaba ku itariki 11 Kamena 2015, ubere I Berlin mu Budage.
Ni izihe kipe ubona zizagera ku mukino wanyuma?Iyo uha amhirwe yo kugitwara ni iyihe?
Renzaho Christophe
TANGA IGITECYEREZO