Kigali

Transfer Deadline Day: Sancho, Dembele na Partey mu bashobora guhindura amakipe ku munota wa nyuma

Yanditswe na: SAFARI Garcon
Taliki:5/10/2020 13:50
0

Mu gihe hasigaye amasaha make ngo isoko ryo kugura no kugurisha abakinnyi i Burayi rifungwe, hakomeje kuvugwa abakinnyi bashobora guhindura amakipe ku munota wa nyuma, barimo Jadon Sancho wifuzwa na Man. United ndetse na Thomas Partey wavuzwe cyane muri Arsenal.



Biteganyijwe ko isoko ryo kugura no kugurisha abakinnyi muri iyi mpeshyi ya 2020, ryafunguwe tariki ya 27 Nyakanga 2020, riza gufungwa none tariki ya 05 Ukwakira 2020, saa 17h00'.

Abakinnyi batandukanye baganiriye n'amakipe yabifuje, ariko kumvikana hagati y'impande bireba bikomeza kuba ikibazo gikomeye, kugeza ubwo abakunzi b'aya makipe bategereje amasaha macye y'iri soko kugira ngo barebe niba impande zombi zimaze igihe zitumvikana ziza kugera ku mwanzuro mwiza uza kubashimisha.

Uru ni urutonde rw'abakinnyi bashobora guhindura amakipe mu masaha macye asigaye ngo isoko ryo kugura no kugurisha abakinnyi rifungwe:

1.Jadon Sancho muri Manchester United


Hashize igihe kitari gito Manchester United iganira na Borussia Dortmund ku igurwa rya Sancho, gusa ariko amakipe yombi yagiye ananiranwa ku giciro cy'uyu mukinnyi.

Dortmund yamenyesheje Manchester United ko nidatanga Miliyoni 130 z'ama-Euros (£108m), batazigera babona uyu mukinnyi, mu mizo ya mbere United yatanze amafaranga macye gusa iza kuyazamura igeza kuri Miliyoni  91 z'ama-Pound.

Ayo mafaranga Dortmund yayamaganiye kure, ivuga ko ikipe yose itazatanga ayo yifuza itazarekura uyu mukinnyi wigaragaje mu mwaka w'imikino ushize.

Manchester United ntirakura amaboko kuri uyu mukinnyi kuko ikiganira na Dortmund mu masaha macye asigaye kugira ngo barebe uko bakwishyura amafaranga ishaka,  bamwegukane.

Si ubwa mbere Man.United yaba iguze umukinnyi ku munsi wa nyuma w'isoko ry'Abakinnyi, kubera ko baheruka kubikora kuri kapiteni w'iyi kipe Harry Maguire wakiniraga Leicester City.

2. Ousmane Dembele muri Manchester United


FC Barcelone yatangaje kenshi ko muri ii mpeshyi amakipe yose yifuza Ousmane Dembele ko yasubiza amerwe mu isaho kubera ko atagurishwa.

Gusa hari amakuru akomeje gucicikana hirya no hino mu bitangazamakuru avuga ko ibiganiro bigeze kure hagati ya Manchester United na Barcelona kugira ngo atizwe muri iyi kipe yo muri premier League.

Koeman arifuza gutiza Dembele muri Man.United, akazana Depay kugira ngo yongere imbaraga mu busatirizi bw'iyi kipe.

Dembele yibasiwe n'imvune za hato na hato nyuma yo kugera i Catalonia avuye muri Dortmund, byatumye adatanga umusaruro yari ategerejweho.

3. Memphis Depay muri FC Barcelona


Kuva yagirwa umutoza mushya wa FC Barcelona, Ronald Koeman, yatangaje ko yifuza bikomeye Memphis Depay muri Barcelona kugira ngo aze kongera imbaraga mu busatirizi bw'iyi kipe.

Biravugwa ko mu masaha macye y'isoko asigaye, Depay wanze kujya muri AC Milan ashobora kurara ashyize umukono ku masezerano muri iyi kipe y'i Catalonia avuye muri Lon yo mu Bufaransa.

4. Thomas Partey muri Arsenal


Uyu munya-Ghana umaze igihe kirekire avugwa muri Arsenal, asobora kurara ashyize umukino ku masezerano nyuma yuko bivugwa ko Arsenal na Atletico Madrid yamaze kumvikana ku kiguzi cya miliyoni 40 z'ama-Pound.

Partey yanze kongera amasezerano muri Atletico Madrid, ataramenya niba ibya Arsenal byanze burundu.

Biravugwa ko Arsenal yitegue gutanga Lucas Torreira ikagerekaho n'amafaranga ikabona Thomas Partey.

5.Dele Alli muri PSG


Nyuma yo kwanga amafaranga yari yatanzwe n'ikipe ya Paris Saint-Germain yo mu Bufaransa, Tottenam Hotspurs ishobora kuba yamaze kwemera kuyakira nyuma yo gusanga Alli adashobora kuzabona umwanya wo gukina muri iyi kipe.

Kugarura Gareth Bale  muri Spurs bica amarenga ko Dele Alli kuzasubira mu kibuga bitari hafi aha, bityo rero bakaba bashobora kumurekura akerekeza muri PSG yagaragaje ko imwifuza cyane.






TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND