RFL
Kigali

Aubameyang wa Arsenal ayoboye urutonde rw’abakinnyi bahembwa agatubutse muri Premier League

Yanditswe na: SAFARI Garcon
Taliki:21/09/2020 18:11
0


Nyuma yo kongera amasezerano mashya y’imyaka itatu muri Arsenal, akanazamurirwa umushahara hafi gukubwa kabiri, rutahizamu ukomoka muri Gabon, Pierre Emerick Aubameyang, yahise aba umukinnyi wa mbere uhembwa agatubutse muri Premier League, aho mu Cyumweru ahembwa ibihumbi 350 by’ama-pound hiyongereyeho n’ibindi.



Aubameyang w’imyaka 31 y’amavuko aherutse gusinya amasezerano mashya y’imyaka itatu muri Arsenal, anazamurirwa umushahara ujya ku bihumbi 350 by’ama-pound ku cyumweru, avuye ku bihumbi 200.

Nyuma yo gushyira umukono ku masezerano mashya y’imyaka itatu muri Arsenal, yagize ati "Ndashaka kuba umunyabigwi wa Arsenal, nka Thierry, Wrighty, Adams na Bergkamp. Ndashaka gusiga ibigwi, aha niho mu rugo, uyu ni umuryango wanjye. Byose ni byiza aha ngaha, dufite ikipe nziza, ibyiza biri imbere".

Ku mwanya wa kabiri mu bahembwa agatubutse muri Premier League, hari Ozil wa Arsenal uhembwa £350,000 mu cyumweru, agakurikirwa na De Gea ukinira Manchester City uhembwa £350,000 mu cyumweru, mu gihe Debruyne wa Manchester City ahembwa £320,000 mu cyumweru.

Kai Havertz uheruka gusinyira ikipe ya Chelsea ari ku mwanya wa gatanu, aho ahembwa £310,000 ku cyumweru. Sterling ukinira Manchester City wasinye imyaka itanu y’amasezerano muri iyi kipe ahembwa £300,000 ku cyumweru.

Paul Pogba wa Manchester United ari ku mwanya wa karindwi mu binjiza menshi muri Premier League, aho yinjiza £290,000 ku cyumweru, mu gihe akurikirwa na Anthony Martial bakinana aho yinjiza £250,000.

Rutahizamu wa Manchester City, Sergio Aguero winjiza £230,000 ku cyumweru, mu gihe Willian uherutse gusinyira Arsenal avuye muri Chelsea ari ku mwanya wa 10 mu binjiza menshi muri Premier League, aho yinjiza £220,000 ku cyumweru.

Aubameyang ayoboye urutonde rw'abahembwa agatubutse muri Premier League





TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND