Nyuma y’amezi atandatu nta mufana wemerewe kugera ku kibuga kiri kuberaho umukino uwo ari wo wose mu gihugu cy’u Bwongereza kubera icyorezo cya Coronavirus, boshobora gukomorerwa ariko hakurikizwa ingamba zo kwirinda ikwirakwira ry’iki cyorezo.
Muri iki cyumweru hateganyijwe inama y’abayobozi bakuru b’imikino mu Bwongereza na Guverinoma y’u Bwongereza igamije gusuzuma uburyo bakongera bakemerera rubanda gusubira ku bibuga by’imikino.
Mu cyumweru gishize, Leta y’u Bwongereza yari yongeye kwihanangiriza abantu bica amategeko n’amabwiriza yo kwirinda COVID-19, ibizeza ko bizagera ku itariki 01 Ukwakira 2020, yamaze gufata umwanzuro ku cyemezo cyo gusubira ku bibuga.
Leta y’u Bwongereza yatangaje ko abantu nibakomeza kwica amabwiriza yo kwirinda iki cyorezo, shampiyona ishobora gusubikwa kugeza igihe hazaba hafashwe ingamba z’uko abafana bashobora kugaruka ku bibuga batekanye.
Premier league yatangaje ko mu gihe amakipe yakomeza gukina mu muhezo, yazatakaza miliyoni 100 z’ama-Pound buri kwezi, kandi ni imwe muri siporo zagizweho ingaruka n’icyorezo cya Coronavirus.
Minisitiri wa Siporo n’ubukerarugendo mu Bwongereza, Nigel Huddleston, yatangaje ko yizeye neza ko guhera ku itariki ya 01 Ukwakira 2020, abafana bashobora gusubira ku bibuga, bakicara bahanye intera kandi bagakurikira umukino nta kibazo.
Biravugwa ko guhera tariki ya 01 Ukwakira 2020, buri kibuga muri Premier League gishobora guhabwa uburenganzira bwo kwakira kuva ku bantu 1000 kugeza kuri 2500.
Muri Premier League abafana bashobora kwemererwa gusubira ku bibuga hubahirizwa amabwiriza yo kwirinda ikwirakwira rya COVID-19
Eng
RSS 
TANGA IGITECYEREZO