Kigali

La Liga: Arturo Vidal yagaruriye icyizere FC Barcelona ku gikombe cya shampiyona

Yanditswe na: SAFARI Garcon
Taliki:13/07/2020 10:52
0

Ikipe ya FC Barcelona yegeye imbere mu manota isatira mukeba wayo w’ibihe byose, kuko kuri ubu irushwa inota rimwe na Real Madrid ya mbere ku rutonde rw'agateganyo rwa shampiyona ya La Liga, nyuma yo gutsindira Real Valladolid iwayo, ku bwa burembe.



Arturo Vidal ni we watsinze icyo gitego kimwe rukumbi muri uwo mukino, ku mupira yaherejwe na kizigenza Lionel Messi.

Real Valladolid yari yabakiriye iwayo yabonye amahirwe yo kuba yakwishyura, ariko igenda iyapfusha ubusa ndetse n'umunyezamu Marc-André ter Stegen ayibera ibamba, arokora kenshi ikipe ya Barcelona yari isumbirijwe.

Real Madrid, ifite umukino itarakina, igomba gukina kuri uyu wa mbere, aho yerekeza ku kibuga cya Granada ku mukino wayo ukurikiyeho.

Iyo Barcelona iza kuba yananiwe gutsinda ku mukino wo ku Cyumweru, Real Madrid y'umutoza Zinedine Zidane yari kuba ifite amahirwe yo kwegukana igikombe ku mukino wayo wo kuri uyu wa mbere.

Uko ibintu bihagaze kugeza ubu, Real ifite amanota 80, ikaba irusha Barça inota rimwe ndetse inayirusha kwitwara neza mu mikino yabahuje.

Mu buryo butunguranye, umutoza Quique Setién ntabwo yashyize Luis Suárez ku rutonde rw'abakinnyi 11 yabanje mu kibuga, ahubwo aha amahirwe Riqui Puig w'imyaka 20 ukina hagati.

Kandi nubwo Barça yinjiye mu mukino neza ndetse ikawiharira, iyi kipe na kapiteni wayo Messi bagiye bakendera uko mukino wakomezaga.

Nubwo urebye Real Valladolid yatumye Messi atigaragaza muri uwo mukino, uyu Munya-Argentine w'imyaka 33 ntibyamubujije gutera indi ntambwe ikomeye.

Yabaye umukinnyi wa mbere muri shampiyona ya La Liga uhereje bagenzi be imipira 20 yavuyemo ibitego mu mwaka umwe w'imikino, kuva Xavi bakinanaga yabigeraho mu mwaka wa 2008 - 2009.


FC Barcelona yatsinze Valladolid isatira Real Madrid mu manota  





TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND