RFL
Kigali

Amerika: Coronavirus ishobora kuzahitana abari hagati y’ibihumbi 100-240 muri iki gihugu

Yanditswe na: Eric Misigaro
Taliki:1/04/2020 13:58
0

Mu magambo yatangajwe na Donald Trump mu kiganiro yagiranye n’itangazamakuru yavuze ko abona Amerika yatewe ititeguye ndetse ko ibyo barimo bimeze nko kwisama wasandaye. Trump avuze ibi yunga mu rya Guverineri wa New York wavuze ko ananiwe guhangana na Covid-19.



Leta Zunze Ubumwe za Amerika ni igihugu cy’igikomerezwa ku Isi. Ubu ni cyo gifite abarwayi benshi banduye icyorezo cya Covid-19 ku Isi yose aho ifite 188,592. Kiza ku mwanya wa 3 mu bifite abarwayi benshi bamaze guhitanwa nacyo aho ifite abasaga 4,056. 

Kuwa 31 Werurwe 2020 ni bwo Perezida Trump yagiranye ikiganiro n’itangazamakuru atangaza ko akurikije umubare w'abantu bamaze guhitanwa n’iki cyorezo muri ibi byumweru bibiri bishize, Amerika ishobora kuba igiye kujya mu kaga muri ibi byumweru 3. Dr.Anthony Fauci na Dr.Deborah Birx

Dr. Deborah Birx ushinzwe Task Force muri White House na Dr. Anthony Fauci uhagarariye ikigo ”National Institute of Allergy and Infectious Diseases” bavuze ko nibura abari hagati 100,000 na 200,000 bashobora kuzahitanwa n'iki cyorezo.

Mu mashusho beretse itangazamakuru ryari riri muri ikiganiro berekanye ko uyu mubare ushobora no kwiyongera ukagera ku 240,000. Aba bayobozi bavuze ko bashimira Leta ya Califonia n'iya Washington kubera ko bari muri Leta zahise zifunga ubucuruzi butari ubw'ingenzi ndetse n'amashuli kuko ibi byatumye iki cyorezo kidakwirakwira cyane.

Ibi byatangajwe n’ibiro bikuru bya Leta Zunze Ubumwe za America ”White House” bashingiye ku mubare w'abantu bamaze kwandura ndetse n’abamaze guhitanwa na Covid-19. Trump ubwe yavuze ko abona iki cyorezo cyamaze gufata indi ntera ndetse ko binarenze uko babitekereza. Leta ya New York ubu iri kwibasirwa na Covid-19 cyane. Donald Trump avuga ko babanje kujenjeka ariyo mpamvu iki cyorezo cyabakaranye.  

Guverineri wa New York ”Andrew Cuomo” mu magambo ye yagize ati” Ndambiwe kwirirwa impande y'iyi virus, twarwanye na yo kuva ku munsi wa mbere”. Yunzemo agira ati "Twagerageje guhangana n'iyi virus. Covid-19 ifite imbaraga, ni ingome cyane kurusha uko twabitecyerezaga”.  

Donald Trump usa n’umunyereye uyu mujyi ndetse uri no mu duce twibasiwe n'iyi virus kurusha ahandi hantu hose ku Isi, yavuze ko uyu mujyi wajenjetse mu minsi yatambutse kuko batangiye babifata nk’imikino ariko ubu yababijije icyocyere.

De Blasio umwe mu bayobozi bayobozi ba New York yavuze ko ubutegetsi bwa New York buri gukora ibishoboka byose ngo bahoshe iki cyorezo muri iyi Leta. Uyu mugabo yatangaje ko bari gukorana n’ibigo by'igenga byaba ari inganda, amahoteli ndetse n'ubundi bucuruzi binyuze mu kubaha amazu n'ibindi nkenerwa byabafasha kwita ku barwayi.

Magingo aya, muri New York, Covid-19 imaze guhitana abantu basaga 1000. Abamaze kwandura iyi ndwara ndetse n'abo yahitanye muri iyi Leta, bararuta abantu bose mu ntara bo mu Bushinwa ”Hubei” aho iyi ndwara yatangiriye.Donald Trump na Dr.Anthony Fauci

Perezida Donald Trump yagize ati ”Ibi bigiye kuba ibyumweru 3 by'indyankurye ku gihugu cya Amerika, ndi gushaka kugabanya umubare w’abantu bahitanwa na covid-19”.  Yavuze ko ari gukora ibishoboka byose ngo bahagarike impfu zikabije.

Mu magambo ya nyuma Trump yavuze ko iyi ndwara itandukanye n’ibicurane bisanzawe n'ubwo bijya gusa ndetse anasaba abaturage kwikuramo kubyitiranya kuko iyi ndwara ari mbi cyane. 

Yasoje nawe ashimangira ko iyi ndwara izabazahaza ndetse ko bakurikije umubare bafite urwaye ndetse n’abamaze gupfa mu byumweru 2 bishize, bateganya ko umubare mucye w'abo izahitana ari ibihumbi 100 ndetse ko bashobora kuzarenga cyane.  

Src: washingtonpost.com, usatoday.com, livescience.com   






TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND