Maria Sharapova uheruka gusura u Rwanda yasezeye burundu ku mukino wa Tennis – AMAFOTO

Kuri uyu wa Gatatu abinyujije mu gitangazamakuru cyandika cyitwa Vanity Fair, Maria Sharapova yatangaje ubutumwa bukubiyemo guhagarika gukina uyu mukino ndetse anagira inama bagenzi be basigaye mu kibuga.

Yagize ati “Nsezeye ku mukino wa Tennis gusa nkuko nubaka ahazaza hanjye, ndashaka ko mutekereza gukora ibyiza mudashidikanya kubabavuga kuko byo ntiwabyirinda. Muzatsindwa inshuro nyinshi isi ibahanze amaso. muzabyakire. Muziyizere ndabasezeranya ko muzagera ku itsinzi."

"Nzakumbura ikipe yanjye abatoza banjye. Nzakumbura ibi bihe hamwe na Papa wanjye twakundaga gukina, akankora mu biganza anshishikarika kwitanga uko nshoboye."

Bigaragara ko Sharapova yari atangiye gusubira hasi kubera ko atakoraga imyitozo uko bikwiye kubera imvune, kuko imikino ine yose aheruka gukina yayitsinzwe.

Uyu mugore wamamaye cyane mu mukino wa Tennis yatwaye igikombe cya ’Grand Slam’ inshuro eshanu akaba kandi yarigeze kuza ku mwanya wa mbere ku isi mu mukino wa Tennis mu bari n’abategarugori mu mwaka wa 2005.

Sharapova ni umwe mu bakinnyi bacye b’abagore bujuje imikino 800 mu mukino wa Tennis ku Isi.

Sharapova asezeye kuri uyu mukino nyuma yuko mu mpera z’umwaka ushize, mu Ugushyingo 2019, yari mu Rwanda n’umukunzi we ubwo bari mu kiruhuko, bakaba barasubiye iwabo banezerewe cyane kubera ibyiza nyaburanga n’urugwiro basanze mu banyarwanda.

Sharapova ufite ibikombe bitanu bikomeye  mu mukino wa Tennis ku isi yasezeye

Sharapova ni umwe mu bakinnyi bafite amateka akomeye muri uyu mukino

Sharapova yari umwe mu bakinnyi bakunzwe ku isi muri uyu mukino

Sharapova yegukanye ibihembo bitandukanye