Cycling: Abakinnyi 6 bayobowe na Areruya bazahagararira u Rwanda muri La Tropicale Amissa Bongo 2020

Kuri uyu wa mbere tariki 23/12/2019, nibwo umutoaza Sempoma Felix yatangaje urutonde rw’abakinnyi bagize ikipe y’igihugu igomba kwitabira La Tropicale Amissa Bongo ibura iminsi 27 ngo itangire. Iri siganwa rikaba riteganyijwe ko rizatangira hagati ya tariki 20 na 26 Mutarama 2020.

Gabon ni igihugu kigizwe n’imirambi cyane kuko imisozi ikirimo ni micye cyane, ibi bikaba byorohereza abakinnyi bazi gusiganwa ahantu harambitse dore ko ari nabo baba bafite amahirwe menshi yo kwegukana iri siganwa mpuzamahanga ry’umukino wo gusiganwa ku magare ‘La Tropicale Amissa Bongo’

Areruya Joseph watwaye La Tropicale Amissa Bongo mu 2018, ari mu ikipe y’abakinnyi batandatu barimo Munyaneza Didier wegukanye Tour du Sénégal y’uyu mwaka, hari kandi Mugisha Samuel watwaye Tour du Rwanda 2018, Nzafashwanayo Jean Claude wegukanye Tour du Congo uyu mwaka, Mugisha Moïse na Uhiriwe Byiza Renus wegukanye amarushanwa y’uyu mwaka ya Rwanda Cycling Cup.

Uretse ikipe y’u Rwanda, La Tropicale Amissa Bongo 2020 izitabirwa kandi n’amakipe arimo Cofidis (France), Total-Direct Energie (France), Delko-Marseille (France), Bai-Sicasal (Angola), Pro Touch (Afurika y’Epfo), Natura4Ever–Roubaix–Lille Métropole (France), Dukla Banská Bystrica (Slovaquie), Algérie, Burkina Faso, Cameroun, Erythrée, Gabon, Cote d’Ivoire na Maroc.

Inzira zizakoreshwa muri iri siganwa rizamara icyumweru

Agace ka mbere: Bitam › Ebolowa, ibilometero 150 (Tariki 20 Mutarama 2020)

Agace ka kabiri: Bitam › Oyem, ibilometero 120 (Tariki 21 Mutarama 2020)

Agace ka gatatu: Mitzic › Ndjole, ibilometero 180 (Tariki 22 Mutarama 2020)

Agace ka kane: Lambarene › Mouila, ibilometero 180 (Tariki 23 Mutarama 2020)

Agace ka gatanu: Lambarene › Kango, ibilometero 140 (Tariki 24 Mutarama 2020)

Agace ka gatandatu: Circuit Port-Gentil, ibilometero 130 (Tariki 25 Mutarama 2020)

Agace ka karindwi: Nkok › Libreville, ibilometero 120 (Tariki 26 Mutarama 2020)

Ikipe izahagararira u Rwanda muri iri siganwa, ikaba ihabwa amahirwe yo kwitwara neza kubera ko ari intoranwa mu beza u Rwanda rufite kandi bakaba bari kumwe n’umutoza w’umuhanga ubazi neza kuva bakizamuka kugeza magingo aya.