WOMEN VOLLEYBALL: RRA yasoje imikino ya shampiyona itsinda KVC na APR bazaba bari kumwe mu mikino ya Playoffs-AMAFOTO

Uyu mukino wabereye muri sitade nto ya Remera, wasize n’ubundi RRA ikomeza kwanikira amakipe bazaba bari kumwe mu mikino ya kamarampaka (Playoffs) igomba gutangira mu minsi iri imbere. KVC ubu iri ku mwanya wa kane n’amanota 25 mu mikino 16 ya shampiyona yakinnye kuko yatakajemo irindwi (7) batsinda icyenda (9) isigaye. RRA yatsinze imikino 15 itakaza umwe (1).

Mu mikino 16 ya shampiyona RRA yatsinzwemo umukino umwe gusa

Nyuma yo gutsinda KVC kuri iki Cyumweru, RRA yasoje itsinda APR VC amaseti 3-1 (19-25,21-25, 25-20 na 15-25). Gusa APR VC nayo yari yabanje kwihererana KV iyitsinda amaseti 3-0 (24-26, 17-25 na 16-25).

RRA WVC, APR WVC, UTB WVC na KVC niyo makipe azakina imikino ya nyuma ya playoffs izavamo ikipe itwara igikombe cya shampiyona 2018-2019 mu cyiciro cy’abagore kuko mu bagabo igikombe cya shampiyona 2018-2019 gifitwe na REG VC yatwaye ihigitse Gisagara VC kuko yayitsinze imikino 2-1 muri playoffs.

APR WVC iri ku mwanya wa kabiri ikarushwa amanota icumi na RRA

Ku rutonde rw’amakipe ane (4) azakina imikino ya Playoffs harimo; RRA iri ku mwanya wa mbere n’amanota 46, APR VC iri ku mwanya wa kabiri n’amanota 36. UTB VC iri ku mwanya wa gatatu n’amanota 35 n’umwenda w’imikino ibiri mu gihe KVC iri ku mwanya wa kane n’amanota 25.

RRA ni ikipe inahabwa amahirwe yo gutwara igikombe cy'uyu mwaka  

 

Umukino wa APR WVC (Umweru n'umukara) na RRA (Ubururu) umaze kuba ishiraniro (Derby)