Ralph Breaks the Internet yongeye kuyobora izindi filime mu kugurwa cyane, dore ko no muri weekend yashize nabwo yari iri ku mwanya wa mbere. Ni filime iri mu bwoko bwa Animation, icuruzwa na Buena Vista ikaba yarasohotse ku itariki 21/11/2018.
1. Ralph Breaks the Internet
Iza ku mwanya wa mbere muri filime ziri kugurwa cyane ku isi, muri iyi weekend yinjije $25,756,000, ayo byatwaye ngo ikorwe ni miliyoni 175. Kuva yasohoka kugeza ubu imaze kwinjiza $206,994,233.
2. Dr Seuss’ The Grinch (2018)
Iyi filime muri iyi weekend yinjije $17,730,000 muri Amerika gusa, icuruzwa na Universal kandi iri mu bwoko bwa Animation. Yasohotse tariki 09/11/2018, kugeza ubu ku isi hose iyi filime imaze kwinjiza $268,307,195. Kuyikora byatwaye miliyoni 75 z’amadolari, ubushize yari ku mwanya wa 3.
3. Creed II
Iyi filime niyo iza ku mwanya wa 3 mu ziri gushakishwa na benshi ku isi. Yasohotse tariki 21/11/2018 ndetse igaragaramo abakinnyi ba filime bakomeye nka Michael B. Jordan, Sylvester Stallone, iri mu bwoko bwa Sports Drama. Muri iyi weekend yinjije $16,832,863 naho uhereye igihe yasohokeye kugeza ubu yinjije $92,569,147. Ayakoreshejwe ngo itunganywe ni miliyoni 50 z’amadolari. Ubushize yari ku mwanya wa 2.
4. Fantastic Beasts: The Crimes of Grindelwald
Ni filime yasohotse tariki 16/11/2018, yari yitezwe na benshi kubera ko yanditswe n’umugore w’umuhanga w’umwongereza J.K Rowling wananditse ibitabo byakunzwe bikomeye cyane ku isi hose bya Harry Potter. Muri iyi weekend yinjije $11,200,000 muri Amerika gusa, ni mu gihe ku isi hose imaze kwinjiza $519,641,406. Kuyikora byatwaye miliyoni 200 z’amadolari. Icuruzwa na Warner Bros, ikaba iri mu bwoko bwa Fantasy. Uyu mwanya wa 4 niwo yari iriho no muri weekend yashize.
5. Bohemian Rhapsody
Ni filime ishingiye ku itsinda ry’abongereza ‘Queen’, nibo baririmbye indirimbo ‘Bohemian Rhapsody’ ari nayo benshi bazi kuri iri tsinda. Iyi filime kandi igaruka by’umwihariko ku buzima bwa Freddie Mercury wari inkingi ya mwamba muri iri tsinda, ni nawe wanditse iyi ndirimbo ‘Bohemian Rhapsody’ yashingiweho hakorwa iyi filime. Yasohotse tariki 02/11/2018, icuruzwa na Fox, muri iyi weekend yinjije $8,100,000. Kuva yasohoka kugeza ubu imaze kwinjiza $539,564,825, kuyikora byatwaye miliyoni 52 z’amadolari. Ubushize n’ubundi yari ku mwanya wa 5.
6. Instant Family
Muri iyi weekend yinjije $7,150,000, yasohotse ku itariki 16/11/2018 ikaba iri mu bwoko bw’urwenya (comedy). Kuva yasohoka kugeza ubu imaze kwinjiza $49,427,769, ni mu gihe kuyikora byatwaye miliyoni 48 z’amadolari ya Amerika. Iyi filime icuruzwa na Paramount, ubushize niyo yari ku mwanya wa 6.
7. The Possession of Hannah Grace
Iyi filime yasohotse kuri uyu wa gatanu tariki 30/11/2018, yabashije kwinjiza $6,500,000 muri amerika gusa. Ni filime iteye ubwoba, ku isi hose yinjije $10,600,000, icuruzwa na Sony/ Screen Gems ikunze gucuruza filime ziteye ubwoba. Gukora iyi filime byatwaye miliyoni 9.5 z’amadolari.
8. Robin Hood (2018)
Muri iyi weekend iyi ndirimbo yinjije $4,700,000, yasohotse tariki 21/11/2018. Icuruzwa na Lionsgate/Summit, ayakoreshejwe ngo itunganywe ni miliyoni 100 z’amadolari. Iri mu bwoko bwa Action/Adventure, kuva yasohoka kugeza yinjije $48,027,682, ubushize yari ku mwanya wa 7.
9. Widows
Ni filime icuruzwa na Fox, yasohotse ku itariki 16/11/2018 ikaba iri mu bwoko bwa Crime Thriller. Irimo abakinnyi bakomeye nka Michelle Rodriguez, Daniel Kaluuya, Viola Davis n’abandi batandukanye. Muri iyi weekend yinjije $4,400,000 muri Amerika gusa. Kuyikora byatwaye miliyoni 42 z’amadolari, kugeza ubu imaze kwinjiza $53,113,696 ku isi hose. Ubushize yari ku mwanya wa 8.
10. Green Book
Ubushize yari ku mwanya wa 9, kuri ubu yinjije $3,900,000 ikaba icuruzwa na Universal. Iyi filime icuruzwa muri Amerika gusa, amafaranga yose imaze kwinjiza kuva yasohoka tariki 16/11/2018 ni $14,016,491. Iyi filime iri mu bwoko bwa Comedy/ Drama.
TANGA IGITECYEREZO