Women Foundation Ministires mu gikorwa cyo gushima Imana (Thanksgiving) ku nshuro ya 12

Women Foundation Ministries (WFM) yatangijwe na Apostle Alice Mignonne Kabera, akaba ari nawe Uyibereye Umuyobozi Mukuru, ifite Icyicaro ku Kimihurura. Women Foundation Ministries mu bikorwa ngarukamwaka igira igikorwa cyo gushima Imana mu bikorwa (Thanksgiving) cyavukiye mu iyerekwa ryahawe umushumba mukuru wa WFM binyuze mw’Ijambo ry’Imana dusanga mu gitabo cyo Gutegeka kwa kabiri 8 :12-14 havuga ngo:

Numara kurya ugahaga, ukamara kubaka amazu meza ukayabamo, inka zawe n’imikumbi yawe, n’ifeza zawe n’izahabu zawe, ni byo ufite byose bikaba bigwiriye, uzirinde umutima wawe we kwishyira hejuru, ngo wibagirwe Uwiteka Imana yawe yagukuye mu gihugu cya Egiputa, mu nzu y’uburetwa.

Gushimira Imana mu bikorwa (Thanksgiving) yatangiye kuva mu mwaka wa 2007, kikaba ari igikorwa kigiye kuba ku nshuro ya 12 gikorwa muburyo bwo gufasha abatishoboye hagamijwe gushishikariza abanyarwanda gushima Imana kubyo yabagejejeho, no kubibutsa umuco nyarwanda w’ubupfura urangwa no Gushimira, Urukundo, Gushigikira abatishoboye n’ibindi. Byumwihariko uyu mwaka, WFM irizihiza imyaka 12 imaze ivutse.

Apostle Mignonne Kabera umuyobozi mukuru wa WFM

Ni muri urwo rwego kuwa Gatanu taliki 30 Ugushingo 2018 kuva saa tatu za mu gitondo, Umuryango Women Foundation Ministries uzerekeza Mageragere mu Karere ka Nyarugenge mu rugendo rwo kujya gufasha ababyeyi bari mu zabukuru batujwe mu Mudugudu wa Nyarurenzi na Rugendabari. WFM batangarije Inyarwanda.com ko bazaba bitwajwe imfashanyo zitandukanye harimo ibikoresho by’isuku, imyambaro, ibiribwa ndetse n'ibindi bikenerwa mu buzima bw'abo babyeyi bwa buri munsi.

Ku Italiki ya mbere Ukuboza 2018, Women Foundation Ministries (WFM) irateganya gukora Dinner mu gikorwa kizitabirwa n'abayobozi ba leta bo mu nzego zitandukanye n'abo mu bigo byigenga, abayobozi b’amadini atandukanye, ibigo by’itangazamakuru bitandukanye ndetse n'abashyitsi bazaba baturutse hirya no hino bazanywe no kwifatanya na bo gushima Imana bizihiza Imyaka 12 WFM yujuje.