Mu ibanga rikomeye Miss Aurore Kayibanda n'umukunzi Egide Mbabazi bagiye gukorera ubukwe muri Amerika

Amakuru agera ku Inyarwanda ni uko ubukwe bwaba bombi bwagizwe ibanga rikomeye cyane ko bigoye kumenya igihe nyacyo cyangwa umunsi buzabera. Aya makuru yagizwe ibanga dore ko bashaka gutungurana nk'uko batunguye abantu ubwo Mbabazi Egide yambikaga impeta uyu mukobwa wambitswe ikamba rya Nyampinga w'u Rwanda mu mwaka wa 2012 akamusaba ko yamwemerera bakazabana.

Miss Aurore na Egide bamaze igihe mu rukundo rukomeye

Muri Gashyantare 2018 ni bwo abantu batunguwe no kubona amafoto ya Egide yambika impeta Miss Aurore Kayibanda, aya mafoto yaratunguranye cyane ko abantu n'ubwo bari bazi ko bakundana ariko nta kimenyetso na kimwe cy'uko bari bagiye kwambikana impeta bigeze bagaragaza. Amakuru agera ku Inyarwanda magingo aya ni uko aba bombi bashaka gukora ubukwe nabwo abantu bukabatungura nk'uko batunguwe bwa mbere.

Uwahaye amakuru Inyarwanda yadutangarije ko ubukwe bw'aba bombi buri vuba nubwo atazi neza umunsi nyiri izina cyane ko ibi birori babigize ibanga ariko kandi ahamya ko byanze bikunze ari vuba cyane ko na bamwe mu bazitabira ubukwe bwabo bavuye mu Rwanda batangiye kugenda ndetse hari n'abagezeyo batashye ubu bukwe. Umwe mu batumiwe muri ubu bukwe waganiriye na Inyarwanda.com yadutangarije ko akireba niba azajyayo ariko yirinda gutangaza igihe nyir'izina azagendera gusa ahamya ko bigenze neza isaha ku isaha yagenda. Andi makuru Inyarwanda yabashije kumenya avuga ubukwe bw'aba bombi buzaba kuri uyu wa Gatanu tariki 27 Nyakanga 2018.

Egide ubwo yari amaze gusaba Aurore ko yazamubera umugore none inzozi zigiye kuba impamo

Uyu watumiwe muri ubu bukwe twirinze gutangaza amazina ye yadutangarije ko mu by'ukuri ubukwe buhari ndetse yabutumiwemo ariko yanga gutangaza amatariki buzaberaho cyane ko ngo bamutumira bamubwiye ko ari ibanga rikomeye. Yemereye Inyarwanda.com ko Miss Aurore Kayibanda na Egide Mbabazi bagiye gukorera ubukwe muri Amerika.

Twagerageje kuvugana na ba nyiri ubwite gusa ntibyadukundiye, turacyashakisha uburyo twabavugisha amakuru menshi y'ubukwe bwa Miss Aurore Kayibanda na Egide Mbabazi tukazayabagezaho mu nkuru zacu zikurikira...