Mu mukino w'umunsi wa 15 wa shampiyona wabaye ku munsi w'ejo ku wa gatanu tariki 27 Mutarama 2017, ikipe ya Rayon Sports yatsinze Kiyovu Sports 3-0, mu mukino wabayemo amakosa menshi ndetse umukinnyi Mukamba wa Kiyovu Sports aza no guhabwa ikarita itukura.
Ni umukino wabereye kuri Stade ya Kigali i Nyamirambo, utangira ku isaha ya saa cyenda n'igice. Rayon Sports niyo yari yakiriye uyu mukino. Kiyovu Sports niyo yatangiye isatira ndetse ibona uburyo bwagombaga kuvamo igitego ariko nyezamu Bakame Eric wa Rayon Sports umupira awukuramo.
Igitego cya mbere cya Rayon Sports cyatsinzwe na Moussa Camara ku mupira yari aherejwe na Mugheni Kakule Fabrice maze na we ahita asiga ab'inyuma ba Kiyovu Sports. Manishiwe Djabel niwe watsinze igitego cya 2 ku munota wa 72. Igitego cya 3 cyatsinzwe na Mugheni Kakule Fabrice ku munota wa 82 biturutse ku mupira w'umuterekano watewe na Djabel ku ikosa ryari rimaze gukorwa na Mukamba Namasombwa ku munota wa 79 ndetse ahita ahabwa ikarita ya 2 y'umuhondo nyuma y'iyo yari yahawe ku munota wa 20.
MU MAFOTO, UKU NIKO BYARI BYIFASHE KU KIBUGA
Uyu mufana wa Rayon Sports yahisemo kwandika amazina y'abakinnyi bakunda kubanzamo ku mwenda we
'Muraho coach Kanamugire...Muraho Masoudi we!'
Nyuma yo kuramukanya, abatoza bombi bagiye baganira
Mbere y'umukino babanje kugirana ikiganiro
Amakipe yombi asohoka mu rwambariro
11 Rayon Sports yabanje mu kibuga...Nahimana Shasir yari yaruhukijwe, we ntabwo yari muri 18 bakoreshejwe kuri uyu mukino
11 ba Kiyovu Sports
Nyuma y'igihe yari amaze yaravunitse, myugariro wa Rayon Sports Mutsinzi Ange yari yagarutse muri 18 Rayon Sports yifashishije muri uyu mukino
Mbere y'umukino barasenga
Kiyovu Sports niyo yatangiye isatira
Mukamba aragerageza kurinda izamu
Abatoza bombi baritegereza uko abakinnyi babo bubahiriza amabwiriza baba babahaye mbere y'umukino
Ni umukino waranzwe no kuvunana kwa hato na hato ku mpande zombi
Abaganga ba Rayon Sports baravura Muhire Kevin
Kwizera Pierrot niwe wateraga myinshi mu mipira y'imiterekano
Mukamba arazibira rutahizamu Moussa Camara
Abakinnyi ba Kiyovu Sports baritegereza umupira wari umaze guterwa na Mouss Camara, ugarurwa n'igiti cy'izamu
Ikosa ryahesheje Mukamba ikarita ya mbere y'umuhondo
Umunyamakuru Kazungu Clever(wambaye ishati y'umweru) arasesengurira uwo bicaranye uko abona umupira uri gukinwa
Ku ruhande rwa Rayon Sports nabo banyuzagamo bakavuna abakinnyi ba Kiyovu Sports
'Ariko bwana musifuzi, ndemera ko ari ikosa ariko ritari kumpesha ikarita y'umuhondo'...Pierrot aburana ku ikarita yari amaze guhabwa nyuma y'ikosa
Nizeyimana Djuma yitegura gusimbura
'Ngwino dusubiremo dore abatoza bawe bibeshye bampa imibare itariyo y'ugomba kuvamo'.Aha umusifuzi yari amaze kubwirwa ko 13 atariwe ugomba kuvamo
Hashize akanya noneho bahamagara Ngabonziza Narcisse numero 18 ko ariwe ugomba gusimburwa
Kuva umukino utangira, Mukamba na Camara baracunganaga...Byageze aho barebana muri ubu buryo
'Mukine umupira, umupira si intambara'
Manzi Thierry, myugariro wa Rayon Sports na we muri uyu mukino yahawe ikarita y'umuhondo
Amakosa mu kibuga yari menshi...Savio arashinyiriza nyuma yo gukocorwa n'umukinnyi wa Kiyovu
Nubwo yatsinzwe 3-0,Kiyovu nayo yanyuzagamo igahererekanya neza umupira
Moustapha wa Rayon Sports yishyushya mbere gato ngo asimbure
Manishimwe Djabel ashoreye umupira wavuyemo igitego cya 2
Cyagezemooooo
Masoudi Djuma aha amabwiriza Rwigema Yves wari ugiye kwinjira mu kibuga
Savio bamucishamo rugondihene
Ikosa Mukamba yakoreye Moustapha
Akaboko k'ibumuso k'umusifuzi karamwereka ikarita y'umuhondo, ak'iburyo nako kitegura kuzamura itukura
Guhabwa ikarita y'umutuku mu mupira w'amaguru bivuze gusohoka mu kibuga...nguwo Mukamba yerekeza mu rwambariro
Manishimwe Djabel yitegura gutera umupira wavuyemo igitego cya 3 cya Rayon Sports
Nyezamu Hategekimana Bonheur yagerageje kuwukuramo ariko uranga umucaho
Ararebana agahinda umupira wari umaze kumucaho ukigira mu ncundura
Mugheni Kakule Fabrice(imbere) yishimira igitego yari amaze gutsinda
Kiyovu Sports ntako itagize ngo ibone n'icy'impozamarira ariko biranga
Moussa Camara asimburwa na Lomami Frank
Nyuma y'umukino byari ibyishimo ku bafana ba Rayon Sports
Umuhanda wose batashye baririmba intsinzi
Ku ruhande rw'abafana ba Kiyovu Sport kari agahinda gusa
PHOTOS: RENZAHO Christophe / INYARWANDA.COM
Eng
RSS 
TANGA IGITECYEREZO