Igihangange kuva mu ikipe ya Real Madrid,Cristiano Ronaldo niwe mukinnyi wahize abandi mu kwitwara neza ku mugabane w’i Burayi mu mwaka w’imikino 2015-2016, aho yaraye abiherewe igihembo ku nshuro ya kabiri.
Ronaldo wafashije Real Madrid kwegukana igikombe cya UEFA Championns ndetse agafasha Portugal gutahana igikombe cya Euro 2016, aheruka kwegukana igihembo cy’umukinnyi mwiza i Burayi mu mwaka w’imikino 2013-2014.
Cristiano Ronaldo ateruye igihembo cy'umukinnyi w'intyoza i Burayi
Gareth Bale (Ibumoso), C.Ronaldo (hagati) na A.Griezman
Uyu musore w’imyaka 31 y’amavuko yahigitse Antoine Griezman umufaransa ukina muri Atletico Madrid bari bahanganye ndetse na Gareth Bale umunya-Wales bakinana muri Real Madrid.
Nyuma yo guhabwa iki gihembo, Ronaldo yavuze ko umwaka w’imikino wari indyankurye kandi ko na bagenzi be bakoze ku buryo iyo bagihabwa bitari ukuba barengereye.
“Ndishimye kuba mpawe iki gihembo, wari umwaka w’imikino udasanzwe mu by'ukuri. Gusa aba bakinnyi bandi (Bale na Griezman) nabo bakwiye iki gihembo kuko barakoze bishoboka”.
Ubwo hatangazwaga ko Cristiano Ronaldo atsinze nk'umukinnyi mwiza i Burayi
Cristiano Ronaldo yagize ibihe byiza mu mwaka w’imikino 2015-2016 kuko nibwo Real Madrid yatwaragamo igikombe cya 11 cya UEFA Champions League ikubise mucyeba Atletico Madrid kuri penaliti muri Gicurasi 2016. Uyu yabikoze mbere yo kwegukana igikombe cya Euro 2016 ayoboye igihugu cya Portugal
Cristiano Ronaldo n'umuhungu we
Mu gutoranya umukinnyi mwiza i Burayi hatora abanyamakuru baturutse mu bihugu 55 byibumbiwe mu mpuzamashyirahamwe y’umupira w’amaguru ku mugabane w’u Burayi.
Umunyanoruvejekazi Ada Hegerberg niwe watwaye igihembo nk’icya Cristiano Ronaldo mu cyiciro cy’abagore. Uyu yahigitse bagenzi be babiri barimo Umufaransakazi Amandine Henry n’Umudagekazi Dzsenifer Marozsan.
Ibi byabaye nyuma yaho hari hamaze gusozwa igikorwa cyo gushyira amakipe mu matsinda yuko amakipe azahura mu mikino ya UEFA Champions League 2016-2017.Ni imikino izatangira kuwa 13 Nzeli 2016 ikazasozwa kuwa 3 Nyakanga 2017.
Umukino wa nyuma uzakinirwa kuri sitade y’igihugu cya Wales mu miujyi wa Cardiff ahasanzwe havuka ikipe ya Cardiff City.
Mbere yuko batangaza uwatsinze, Ronaldo , Bale na Griezman buri umwe yarebaga ukwe
Mbere yuko umuhango utangira yabanje gusinyira 'Autograph' abafana be
Dore uko amakipe yatombolanye mu matsinda ya UEFA Champions League 2016:
Group A: Paris Saint Germain, Arsenal, FC Basel, Ludogorets.
Group B: Benfica, SSC Napoli, Dynamo Kyiv, Beşiktaş.
Group C: FC Barcelona, Manchester City, Borussia Monchengladbach,Celtic.
Group D: Bayern Munchen, Atletico Madrid, PSV Eindhoven, Rostov.
Group E: CSKA Moskva, Bayer Leverkusen. Tottenham, Monaco.
Group F: Real Madrid, Borussia Dortmund, Sporting CP, Legia.
Group G: Leicester City, FC Porto,Club Brudge, København
Group H:Juventus, Sevilla, Lyon, Dinamo Zagreb.
TANGA IGITECYEREZO