Ubuhinzi bw'imboga za Dodo bwamuhesheje igihembo yahawe na Barack Obama

Amakuru dukesha ikinyamakuru Afrifame.bi cyandikirwa mu Burundi avuga ko iki gihembo uyu mubyeyi kuri ubu utuye muri Leta zunze ubumwe za Amerika, akaba akorayo ubuhinzi bw’imboga za Dodo yagihawe kuwa 2 w’iki cyumweru mu birori byabereye mu biro bya perezidansi y’iki gihugu (White House), aho yabaye indashyikirwa mu bantu 15 bari batowe akaba yaragishyikirijwe na perezida Barack Obama.

Fabiola yahawe igihembo gikomeye na Leta zunze ubumwe za Amerika kubera ubuhinzi bwa Dodo

Aya makuru akomeza avuga ko, Fabiola umaze imyaka 7 muri iki gihugu, yahawe iki gihembo kubera ubudashyikirwa yagaragaje mu kwita kuri iki gihingwa benshi bakunze gusuzugura, aho akigera muri iki gihugu yahise yigisha abantu bagera kuri 200 uburyo bahinga ndetse n’uburyo bita kuri izi mboga, nawe ubwe akaba yemera ko ntamwuga udakiza dore ko yatunguwe no guhabwa iki gihembo n’igihugu cy’igihangange nka Leta zunze ubumwe za Amerika.

Uretse kwigisha abantu uburyo bahinga imboga, kandi, Fabiola yagiye yifashishwa cyane muri resitora zinyuranye aho yagiye atanga amahugurwa y’uburyo bwo guteka izi mboga mu buryo bugezweho.

Umuririmbyi Gabiro niwe waririmbye ati: “Njye nizera ko mu gihe nkihumeka, sinzigera mpinduka mu myumvire! Igihe kizaza ibindi bizahita, isi yose izamenya ikindimo. Nawe byakubera!” Fabiola nawe ajya guhinga izi mboga, niwo mwuga ubuzima bwari bumwerekejemo, ntiyarazi ko hari igihe kizagera ibyo akora nk’akazi bikamuviramo ibindi bihembo. Ntamwuga udakiza!

Mutiganda Janvier