Ishyirahamwe ry'Umupira w'Amaguru muri Kenya FKF) ryatangaje ko ryahagaritse umunyezamu Patrick Matasi mu gihe cy'iminsi 90 nyuma yo gukekwaho kugurisha imikino binyuze ku bategura imikino y'amahirwe 'Betting'.
Mu itangazo iri Shyirahamwe ryashyize hanze, ryavuze ko hafashwe uyu mwanzuro hagendewe ku mabwiriza yaryo arwanya abagena ibiva mu mukino ndetse ko ryabimenyesheje Patrick Matasi na Kakamega Homeboyz yakiniraga.
Iri shyirahamwe ryavuze ko riri gukora iperereza kuri uyu munyezamu rifatanyije n'impuzamashyirahamwe y'umupira w'amaguru ku Mugabane wa Afurika, CAF, impuzamashyirahamwe y'umupira w'amaguru ku Isi FIFA ndetse n'izindi nzego.
Ibi bije nyuma y'uko Patrick Matasi wahoze akinira ikipe y'igihugu ya Kenya hari amashusho yagiye hanze bivugwa ko ari aye ari mu modoka arikumwe n'undi muntu yarimo aragurishaho imikino.
Muri aya mashusho uwo muntu yagiraga ati" Watwizeza ibitego bibiri mu gice cya mbere? Ntakindi dukeneye… Niba umukino ugiye mu minota 20 utarinjizwa, umukino uba ufunze. Ariko niba winjijwe hakiri kare, mbere y'uko umukino ushyuha, uba uwufunguye".
Uyu munyezamu we amusubiza agira ati: "Yego. Uzi icyo nzakora? ibi byose ariko bizacamo bigendanye n’icyo nzaba navuganye na ba myugariro banjye".
Patrick Matasi yakiniye amakipe atandukanye muri Kenya arimo Tusker FC, AFC Leopards, Saint Georges FC yo muri Ethiopia na Kenya Police FC ari nayo aherukamo gusa ikaba yaramurekuye ku mpamvu zitazwi.
Umukino aheruka gukinira ikipe y'igihugu ya Kenya ni uwo yatsinzwemo na Cameroon ibitego 4-1 mu mwaka ushize gusa igitego cya nyuma yagitsinzwe mu buryo budasabonatse ari naho benshi batangiye kumukeka.
Patrick Matasi yahagaritswe iminsi 90
Eng
RSS 
TANGA IGITECYEREZO