Sudani y'Epfo hashobora kwaduka intambara ikaze kubera ifungwa rya Visi Perezida Riek Machar

Nk'uko bitangazwa  na BBC, amakuru aturuka ku muvugizi w'ishyaka SPLM-IO rya Machar, Pal Mai Deng, avuga ko  afungiwe iwe mu rugo i Juba kuva ku mugoroba wo ku wa Gatatu, igikorwa cyateje impagarara hagati ya Perezida Salva Kiir n'uruhande rwa Machar.

 UNMISS ivuga ko ifungwa rya Machar ryagabanyije icyizere cy'amahoro arambye mu gihugu, nyuma y'intambara yadutse mu 2013 hagati ya Kiir na Machar, yakurikiwe n'impfu, ubuhunzi, inzara ikabije, urugomo n’ibindi bibazo mu gihugu. Ibintu byongeye kuzamba nyuma y'uko Perezida Kiir mu kwezi gushize yirukanye ba Visi Perezida babiri n'umuyobozi w'urwego rushinzwe ubutasi, bose bari ku ruhande rwa Machar.

Ibi byatumye imikoranire hagati ya Kiir na Machar irushaho gukomera, nubwo hari amasezerano y'amahoro yo mu 2018 yari agamije guhuza impande zombi no kugarura amahoro. UNMISS irasaba ko impande zose zashyigikira amasezerano y'amahoro mu bikorwa, kuko gusubira mu ntambara byagira ingaruka ku gihugu ndetse n’akarere kose.

Nyuma y'ibitero byahereye mu mujyi wa Nassir, ikibazo hagati ya Kiir na Machar kimaze kurushaho gukurura impagarara. Perezida Kiir akomeza agaragaza impungenge ku mugaragaro ko Machar ashaka kumuhirika ku butegetsi, ibintu byakongera gutuma igihugu gisubira mu bihe by'amage.

UNMISS irakangurira amahanga ndetse n'abaturage ba Sudani y'Epfo kwitonda no kwitwararika ku girango hataza kongera kwaduka intambara ikaze aho muri iki gihugu cyakunze kwibasirwa n’amakimbirane.