Ubwoba mu buyobozi bwa Amerika nyuma yo gushyira ahagaragara amakuru y'ibitero bya gisirikare muri Yemen

Muri iryo tsinda, hagaragaye ubutumwa bwahishuraga igihe n’ahantu igitero cya gisirikare cyari kugabwa ku barwanyi ba Houthi muri Yemen.

Ku wa 15 Werurwe 2025, Umunyamabanga wa Leta ushinzwe Ingabo yohereje ubutumwa mu itsinda rya Signal, atanga amakuru arambuye ku bitero byari byateguwe. Ubutumwa bwe bwarimo igihe nyacyo igitero cyagombaga gutangiriraho, aho cyari kugabwa ndetse n’ubwoko bw’ibisasu byari bukoreshwe. Ibyo byose byabaye mu gihe uwo munyamakuru yari mu itsinda, nubwo atari agenewe kuba aririmo.

Iri tsinda ryari rigizwe n’abayobozi bakomeye barimo Visi Perezida wa Amerika, Umunyamabanga wa Leta, Umuyobozi Mukuru w’Ubutasi n’Umujyanama Mukuru w’Umutekano. Kuba umunyamakuru yaramenye amakuru akomeye nk’aya byateje impungenge zikomeye ku mutekano w’igihugu, bigaragaza icyuho mu icungwa ry’amakuru y’ibanga.

The Atlantic yatangaje ko yabonye aya makuru nyuma y’uko umwanditsi mukuru wayo, Jeffrey Goldberg, yinjiye muri iryo tsinda atabigambiriye. Iki kinyamakuru cyatangaje ubutumwa bugaragaza uko abayobozi ba Amerika baganiriye kuri ibyo bitero mbere y’uko bigabwa.

Guverinoma ya Amerika yahakanye ko nta makuru y’ibanga yashyizwe ahagaragara, ivuga ko ibyavugiwe muri iryo tsinda atari "amabanga ya gisirikare." Gusa, ibisobanuro byatanzwe ntibyanyuze benshi, kuko ubutumwa bwagaragaye bwari burimo amakuru arambuye ku bitero byari byateguwe.

Iyi nkuru yateje impagarara mu nzego za gisirikare n’iza guverinoma muri Amerika, hatangira iperereza ku buryo aya makuru yasohotse.

Abasesenguzi mu by’umutekano bavuze ko gukoresha porogaramu nk’iyo mu gutanga amakuru y’ibanga bishobora guteza ibibazo bikomeye, basaba ko hakongerwa uburyo bwizewe bwo gutanga amakuru akomeye kandi hakaba igenzura rikomeye ku micungire y’aya makuru.

Jeffrey Goldberg umwanditsi Mukuru wa The Atlantic