Abenshi intsinzi zarabuze! Uko abakinnyi b'Abanyarwanda bakina hanze bitwaye mbere yo kujya mu Amavubi

Duhereye muri Libya ku wa Gatanu w'icyumweru gishize ikipe ya Al Ahli Tripoli ikinamo Manzi Thierry na Bizimana Djihad yanganyije 0-0 na Al Watan 0-0.

Aba bakinnyi b'Amavubi bose bari babanje mu kibuga gusa Manzi Thierry aza gusimbuzwa ku munota wa 75. 

Kugeza ubu Al Ahli Tripoli iri ku mwanya wa Mbere  ku rutonde rwa shampiyona, ikaba izasubira mu kibuga tariki ya 6 Mata ikina na Al Khums.

Muri shampiyona y'icyiciro cya mbere muri Tunisia, ku wa Kane ikipe ya Stade de Tunisien ikinamo Mugisha Bonheur yatsinzwe na Club Africain 1-0.

Uyu mukinnyi w'Umunyarwanda ntabwo yakoreshejwe kuri uyu mukino. Kugeza ubu Stade de Tunisien iri ku mwanya wa 6 ku rutonde rwa shampiyona ikaba izasubira mu kibuga ikina na CS Sfaxien tariki ya 12 Mata.

Muri iyi shampiyona kandi ku wa Kane ikipe ya Olympic de Beja ikinamo Ishimwe Anicet yatsinzwe na Tataouine 2-1. Uyu mukinnyi w'Amavubi ntabwo yabanje mu kibuga ariko yinjiyemo asimbuye ku munota wa 74.

Kugeza ubu Olympic de Beja iri ku mwanya wa 9 ku rutonde rwa shampiyona, ikaba izasubira mu kibuga ikina na Soliman tariki ya 12 z'ukwezi gutaha.

Muri shampiyona y'icyiciro cya mbere mu Misiri, ku wa Kane ikipe ya Zed FC ikinamo Rafael York yatsinze iyitwa Ghazl El Mahalla SC 3-0.

Uyu mukinnyi wahamagawe mu Amavubi ntabwo yigeze akoreshwa kuri uyu mukino dore ko atari no ku ntebe y'abasimbura. 

Zed FC iri ku mwanya wa 4 mu itsinda B irimo mu mikino ya kamarampaka ya shampiyona, ikaba izasubira mu kibuga ikina na Al Masry mu gikombe cy'igihugu ku wa Gatatu.

Muri shampiyona y'icyiciro cya mbere muri Afurika y'Epfo mu ikipe ya Kaizer Chiefs ikinamo Ntwari Fiacre, ku munsi w'ejo yatsinzwe na Richard Bay ibitego 2-0. 

Uyu munyezamu w'Amavubi ntabwo ariwe wabanje mu kibuga ariko yari ku ntebe y'abasimbura. 

Kaizer Chiefs iri ku mwanya wa 8 ku rutonde rwa shampiyona, ikazasubira mu kibuga ikina na Golden Arrows tariki ya 30 z'uku kwezi.

Muri shampiyona y'icyiciro cya mbere muri Azerbaijani,ku wa Gatandatu ikipe ya FC Zira ikinamo Mutsinzi Ange yanganyije na Sabah 1-1.

Ntabwo uyu myugariro w'Amavubi yabanje mu kibuga gusa yinjiyemo asimbuye ku munota wa 90. 

FC Zira iri ku mwanya wa 2 ku rutonde rwa shampiyona, ikaba izasubira mu kibuga tariki ya 30 z'uku kwezi ikina na Samaxi.

Muri iyi shampiyona kandi ikipe ya Sabail FK ikinamo Nshuti Innocent ,ku munsi w'ejo yatsinzwe na Neftçi PFK ibitego 2-1. 

Ntabwo uyu rutahizamu w'Amavubi yari yabanje mu kibuga ariko yinjiyemo asimbuye ku munota wa 57. 

Kugeza ubu Sabail iri ku mwanya wa nyuma ku rutonde rwa shampiyona, ikaba izasubira mu kibuga ikina na Kapaz tariki ya 30 z'uku kwezi.

Muri shampiyona y'icyiciro cya kabiri mu Bubiligi, ku wa Gatanu ikipe ya Raal La Louviere ikinamo Samuel Gueulette yatsinze K. Lierse S.K ibitego 2-1.

Ntabwo uyu mukinnyi w'ikipe y'igihugu y'u Rwanda, Amavubi, yari yabanje mu kibuga ariko yinjiyemo asimbuye ku munota wa 77.

Kugeza ubu Raal La Louviere iri ku mwanya wa 3 ku rutonde rwa shampiyona, ikaba izasubira mu kibuga ikina na Jong KRC Genk U23 tariki ya 29 z'uku kwezi

Muri shampiyona y'icyiciro cya mbere mu Bubiligi, ku munsi w'ejo ikipe ya Beerschot ikinamo Hakim Sahabo yatsinzwe na Westerlo ibitego 2-1.

Uyu mukinnyi w'Amavubi yari yabanje mu kibuga gusa aza gusimbuzwa ku munota 60. Ikipe ya Beerschot iracyakomeje kuba ku mwanya wa nyuma ku rutonde rwa shampiyona.

Muri shampiyona y'icyiciro cya kabiri muri Leta zunze ubumwe z'Amerika, ejo ikipe ya Rhode Island ikinamo Kwizera Jojea yatangiye itsindwa na Charleston Battery ibitego 2-0.

Uyu mukinnyi w'Amavubi yari yabanje mu kibuga ndetse nta nubwo yigeze asimbuzwa. Rhode Island izasubira mu kibuga ikina na North Carolina FC tariki ya 30 z'uku kwezi.

Kwizera Jojea yakinnye iminota yose y'umukino ikipe ye ya Rhode Island yatsinzwemo na Charleston Battery

Ikipe ya FC Zira ikinamo Mutsinzi Ange yaratsinzwe