Amatike y'umukino w’Amagaju na Rayon Sports amaze kugurwa ku kigero cya 65%

Ni mukino w’umunsi wa 18 wa Shampiyona uzabera kuri Stade Huye uzakinwa guhera saa kumi n’imwe z’umugoroba.

Nshimyumuremyi Paul, Perezida w’Amagaju FC, yavuyze ko amasaha y'uyu mukino yashyizwe nyuma ya saa sita kugira ngo abafana baturuka mu zindi ntara babashe kuwitabira, kuko uwo munsi ari umunsi w’umuganda.

Ku bijyanye n’amatike, Nshimyumuremyi yavuze ko kugeza ubu 65% by’amatike yamaze kugurwa, aho ay'icyiciro cya VVIP yamaze gushira. Itike y’ahasanzwe igura 3,000 FRW, ariko igahinduka 5,000 FRW guhera saa sita z’ijoro kuri uyu wa Gatanu. 

Ahatwikiriye igura 5,000 FRW, ikaza guhinduka 7,000 FRW mu masaha y’ijoro, mu gihe mu cyiciro cya VIP ari 10,000 FRW, ariko iraba ari 15,000 FRW nijoro. Izo mu cyiciro cya VVIP, zari ziri kugurwa 20,000 FRW, zamaze gushira.

Rayon Sports izakina uyu mukini idafite intwarpo nka Kapiteni Muhire Kevin wavunitse, akaba ashobora kumara ibyumweru bibiri adakina. 

Abandi bakinnyi b’inkingi za mwamba batari buze gukina uyu mukino ni Omborenga Fitina na Adama Bagayogo, bafite amakarita atatu y’umuhondo.

Umukino Rayon Sports iheruka gukinira kuri Stade ya Huye yatsinzwe na Mukura ibitego 2-1.

Kugeza ku munsi wa 17 wa Shampiyona, Rayon Sports iri ku mwanya wa mbere n’amanota 40, ikurikiwe na APR FC ifite amanota 37. Amagaju FC yo ari ku mwanya wa munani n’amanota 22.

Perezida w'Amahaju Paul yashimangiye ko ikipe ayoboye izitwara neza imbere ya Rayon Sports ibura abakinnyi bayo bakomeye

Amatike y'umukino wa Rayon Sports n'Amagaju amaze kugurwa ku kigero cya 65%