Jonathan Niyo wiyemeje gusohora indirimbo buri kwezi yasabye abantu kwiyegurira Imana - VIDEO

Ni indirimbo imara iminota itandatu n’amasegonda atanu yasohotse kuri uyu wa Gatatu, tariki ya 5 Gashyantare 2025.

Jonathan Niyo usanzwe atuye mu Bubiligi, ni umuhanzi ufite inkomoko mu Burundi. Uyu muhanzi w'indirimbo zo kuramya no guhimbaza Imana, mu myaka itatu ishize, yabwiye InyaRwanda.com ko afite umuhamagaro wo gukora indirimbo zikangurira Itorero kwegera Imana no kuyikorera byimbitse ndetse no gushima ibyiza Imana ikora.

Mu kiganiro na InyaRwanda, Jonathan Niyo yavuze ko indirimbo ishingiye ku ijambo ry’Imana riboneka muri Bibiliya, muri 1 Samweli 15:22, rigira riti: “Samweli aramusubiza ati ‘Mbese Uwiteka yishimira ibitambo byoswa n’ibindi bitambo kuruta uko yakwishimira umwumviye? Erega kumvira kuruta ibitambo, kandi kwitonda kukaruta ibinure by’amasekurume y’intama.’

Asobanura inkomoko y’izina ry’iyi ndirimbo yagize ati: “Nayise ‘Nguhaye Umutima’, kugira ngo abantu mbibutse ko Imana icyo ibifuzaho ari ukuyiha imitima yabo, kugira ngo ibayobore inabahumurize mu gihe bari mu makuba.”

Yavuze ko gukorana indirimbo na Obed Zawadi, byatewe n’umutima yamubonanye. Ati: “Bwa mbere iyi ndirimbo nari narayikoze, ariko umunsi mpura na Obed, umutima wo gukorera Imana namusanganye, byatumye numva nkwiriye gukorana nawe.”

Jonathan Niyo yasobanuye ko intego ye mu muziki wo kuramya no guhimbaza Imana ari ugutuma abantu bagira imitima isukuye. Ati: “Nta kindi Imana itwifuzaho uretse umutima usukuye. Bumvire, bakorera Imana imwe yabaremye.”

Uyu muramyi yatangaje ko uyu mwaka ari uwe wo gukora, kuko ubu afite indirimbo 14, zirimo eshatu yakoranye n’abandi (collabo). Ati: “Abakunzi banjye banyitege, buri kwezi nzajya nsohora indirimbo imwe, ifite na video. Banyitega buri kwezi.”

Jonathan Niyo ni umuhanzi akaba n’umukozi w’Imana, akunzwe n’urubyiruko ndetse n’ingeri zose kubera indirimbo aririmba zibafasha gutegura imitima yabo mu kwegera Imana. Yamenyekanye cyane mu ndirimbo zirimo ‘Amahoro yanjye’, ‘Safari,’ na ‘Ewe Getsemane’ n’izindi.

Umuramyi Jonathan Niyo yashyize hanze indirimbo isaba abantu kugandukira Imana, ateguza indirimbo nshya buri kwezi muri uyu mwaka

Kanda hano urebe indirimbo nshya Jonathan Niyo yafatanije na Obed Zawadi bise "Nguhaye Umutima"