Ubwiru ku nyanja itukura, iy'umukara, umweru n'iy'umuhondo

Inyanja  y'Umukara 

Inyanja y’Umukara iherereye kuri Turkiya, u Burusiya,Ukraine,Bulgalia na Georgia, mu buryo bwa mbere, yiswe n’Abagiriki ba kera bayitaga "Inhospitable Sea", bisobanura inyanja itorohereza abagenzi.

Impamvu y’irizina ni uko kugenda muri iyi nyanja byari bigoye kandi inkombe zayo zari zituwe n’imiryango yitwaga  iy'abagome.

Nyuma y’uko abakoloni b’Abagiriki bagera ku nkombe z’inyanja bakaziteza imbere, bayihinduye iryo zina bayita Hospitable Sea, bisobanura inyanja yorohereza abagenzi.

Inyanja y’Umukara ifite ubujyakuzimu burenga metero 150, kandi amazi yayo y’ibice biri munsi ya kilometero ebyiri yuzuyemo umwuka wa hydrogen sulfide. Ibi bituma mu bice byo hasi kundiba nta kinyabuzima kiba kihaba usibye udukoko twitwa sulfur bacteria.

Hari impamvu nyinshi zishobora kuba zaratumye iyi Nyanja iba Umukara

Ibintu byose birimo ibyuma, ibimera n’ibisigazwa by’inyamaswa biramanuka bikajya munsi ya metero 150 bikamaramo igihe kinini, bigahinduka umukara kubera umwuka wa hydrogen sulfide wihariye muri iyi nyanja.

Indi mpamvu abasare bemeza ko mu gihe cy’imvura n’imiyaga ikaze mu bihe by’ubukonje, iyi nyanja isa n’umukara kubera igicucu cyayo.

Inyanja Itukura

Inyanja Itukura iherereye hagati ya Afurika na Aziya, izina ryayo rituruka mu rurimi rw’Ikigereki rya kera aho bayitaga “Erythra Thalassa”. Mu ndimi z’Abanyaburayi gusa ni ho iyi nyanja ishyirwa mu mutuku mu gihe mu Giheburayo bayita “Yam Suph”, bisobanura Inyanja y’Ibyatsi byo mu mazi, naho mu Misiri ikitwa “Green Space”, cyangwa ahantu h’icyatsi nk'uko tubikesha Live Science.

Inyanja Itukura ni yo nyanja ifite umunyu mwinshi cyane urenga garama 40 kuri litiro y’amazi kandi ntirimo uruzi na rumwe ruyinjiramo.

Abahanga bavuga ko iyi nyanja yiswe Umutuku kubera urubobi rutukura na bakiteriya ya “Trichodesmium erythraeum” iboneka mu mazi yayo, ikayaha ibara ritukura n’umutuku wivanze n’icyatsi kibisi.

Inyanja y’Umweru 

Inyanja y’Umweru ni inyanja yo mu majyaruguru y’u Burusiya. Mu mezi agera kuri atandatu cyangwa arindwi buri mwaka, iba yarengewe n’urubura.

Kuba inyuma yayo igaragara nk’urubura rw’umweru igihe cyose, cyane cyane mu gihe cy’ubukonje bukabije.

Amazi yayo agaragara nk’umweru kubera uko ibicu byo mu majyaruguru, biyiha igicucu cy’aho igihe biba biri hejuru yayo nk'uko tubikesha Smith Sonian science Educaion Center.

Inyanja y’Umuhondo 

Inyanja y’Umuhondo ni inyanja ikikijwe n’ibihugu by’Aziya nk’u Bushinwa n’ibirwa bya Koreya. Izwiho kugira umuvumba mwinshi aho amazi ashobora kuzamuka ku nkombe agashyika kuri metero 10 nk'uko tubikesha Marriam Webster. 

Abahanga bavuga ko yiswe Umuhondo kubera ibara ry’amazi yayo rifitanye isayo n'imigezi minini nka “Yellow River” n’isuri itwara ubutaka bwinshi bw’umuhondo buva mu misozi yo mu gihugu cy’u Bushinwa.