Mikel Arteta yagaragaje icyizere cya Arsenal muri UEFA Champions League

Nyuma y’umukino, Mikel Arteta yavuze ko ikipe ye ifite intego yo gukomeza gutsinda mu cyumweru gitaha kugira ngo yizere neza itike yo gukina muri 1/8.

Ibitego by’uyu mukino byatsinzwe na Declan Rice mu masegonda 106' gusa nyuma yo gutangira umukino, Kai Havertz mu gice cya kabiri, ndetse na Martin Odegaard mu minota y’inyongera. 

Iyi ntsinzi yashimangiye umwanya wa gatatu wa Arsenal ku rutonde rugaragaza uko amakipe ahagaze muri UEFA Champions League, aho ikeneye inota rimwe gusa mu mukino izasuramo Girona kugira ngo yizere itike yo gukomeza mu cyiciro gikurikuyeho.

N’ubwo Arsenal yazatsindirwa muri Girona, amahirwe yayo yo gukomeza muri 1/8 aracyari hejuru kubera ko ifite amanota atatu n’itandukaniro ry’ibitego riruta iry’andi makipe ari munsi yayo. Arteta yagaragaje icyizere, avuga ko azategura ikipe ye neza ku buryo itsinda uyu mukino ukurikira wa Girona.

Mikel Arteta yagize ati: “Iyi ni intambwe ikomeye. Twatsinze ibitego bitatu, twihariye umukino, kandi nta gitego twinjijwe. Ubu dufite umwanya mwiza cyane mbere yo gukina na Girona."

Declan Rice yafunguye amazamu ku buryo butunguranye nyuma yo guhabwa umupira mwiza na Kai Havertz. Arteta yashimye imikinire ya Rice, avuga ko ashobora kugera kure muri Champions League mu gihe azajya yibanda ku myanya y’abakinnyi bashaka ibitego.

Ati: “Mu minsi ishize Rice yabonye uburyo bwo gutsinda inshuro nyinshi. Tugomba gukomeza kumusaba gutanga umusaruro muri izi nshingano,”

Kai Havertz na we yakomeje kwerekana ko ari umukinnyi ukomeye nyuma yo kwitwara neza mu mikino ibiri iheruka. N’ubwo yahuye n’ibibazo bikomeye birimo gutotezwa kuri murandasi nyuma yo guhusha penaliti muri FA Cup, Arteta yamushimiye ku kwihangana no gutanga umusaruro.

Ati: “Havertz yagaragaje ko afite ubushobozi bwo guhindura ibitekerezo by’abantu bishingiye ku by’ukuri aho kuba amarangamutima,”

Mu gihe Arsenal izajya gukina na Girona mu mukino ukurikira wa Champions League, intego ni ukwegukana inota rimwe gusa kugira ngo yizere gukomeza mu buryo bw’umutekano. 

Arteta yavuze ko nibatsinda, ikipe izamera nk’iri mu myitozo mu gihe andi azaba ari guhangana. Ati: “Twahuye n’umuvuduko mwinshi w’imikino. Nidushobora kugera ku ntego, bizaba ari intsinzi ikomeye kuri twese,”

Mikel Arteta ukomeje kwitwara neza mu mikino ya UEFA Champions League yagaragaje ko bakwiye kuzitwara neza mu mukino wa Girona kugira ngo bazabone itike ya 1/8 bidasubirwaho

Arsenal ikomeje gutanga isomo mu mikino ya UEFA Champions League