Neymar yinjiye mu biganiro byo gutandukana na Al Hilal

Nyuma yo kuva muri Paris Saint-Germain mu 2023, Neymar yerekeje muri Al Hilal aho yashakaga gukomeza gukina nyuma y'imyaka myinshi yari amaze ku mugabane w’Iburayi, ariko imvune nyinshi n'ikibazo cy'umubiri (Body fitness) byamugoye cyane, kandi kugeza ubu, amaze gukina imikino irindwi gusa mu gihe cyose amaze muri Saudi Arabia.

Neymar, wamenyekanye cyane muri Barcelona na PSG, yagiye muri Al Hilal afite amasezerano akomeye, agenerwa umushahara wa miliyoni 104 z'amadolari ku mwaka (miliyoni 84 z'amapawundi). 

Icyakora, nubwo abakinnyi bo muri Saudi Arabia bahabwa amafaranga menshi, ikibazo gihari ni uko ibyo Neymar asaba ku bijyanye n’imishahara biracyari imbogamizi zikomeye mu biganiro by'uko yasesa amasezerano n’iyi kipe.

Umwe mu bakozi b’ikipe ya Al Hilal, yavuze ko Neymar ari kuganira na Al Hilal kuri gahunda yo kuva muri iyi kipe, ariko byabaye ngombwa kugenzura cyane ibyo asaba mu rwego rw’imari.

Amakuru avuga ko Santos, ikipe Neymar yatangiriyemo amenyekana, iri mu biganiro na we ngo asubire gukina mu gihugu cye. Al Hilal nayo irifuza kumugurisha, ariko Neymar we akifuza gusubira muri Brazil .

Nyamara n’ubwo Neymar atakiri umukinnyi wo kwifuzwa n’ikipe iyo ariyo yose, ni umukinnyi wamamaye cyane ubwo agurwaga amafaranga menshi mu mateka y’umupira w’amaguru muri 2017, ubwo yerekeje muri PSG avuye muri Barcelona ku kiguzi cya miliyoni 220 z’amayero.

Mu minsi ishyize uyu mukinnyi ntabwo yagaragaye mu bakinnyi ikipe ye izifashisha mu mikino ya Saudi Pro League, kubera ko atari ku rwego rwiza rwo gukina, ikaba ariyo mpamvu nyamukuru ashaka gutandukana nayo.

Neymar yinjiye mu biganiro byo gutandukana na Al Hilal yo muri Alabia Saudite