Abakinnyi babiri aribo Umunye-Congo, Ntamba Musikwabo Malick na Raymond Lolendi Ntaudyimara ukomoka muri Zanzibar bagaragaye mu myitozo y'ikipe ya Rayon Sports.
Kuri uyu wa Mbere tariki ya 21 Mutarama 2025 ni bwo ikipe ya Rayon Sports yasubukuye imyitozo mu Nzove yitegura imikino y'igikombe cy'Intwali n'imikino yo kwishyura ya shampiyona.
Muri iyi myitozo hagaragayemo abakinnyi bashya bakina basatira barimo Ntamba Musikwabo Malick ukomoka muri Congo akaba yari asanzwe akinira ikipe y'iwabo ya AS Kabahasha yo muri shampiyona y'icyiciro cya kabiri.
Hari kandi na Raymond Lolendi Ntaudyimara w'imyaka 19 ukomoka muri Zanzibar akaba yakiniraga ikipe ya JKU y'iwabo.
Aba bakinnyi bombi bari gukorera igeragezwa muri Rayon Sports aho n'ibaramuka bashimwe n'umutoza ndetse n'ubuyobozi bazahita basinyishwa.
Nubwo ari aba gusa bagaragaye ariko byitezwe ko ejo hari n'abandi bashobora kuzagaragara mu myitozo bakorerwa igeragezwa barimo Abanya-Uganda, Bayo Aziz Fahad ukina nka rutahizamu na Bright Anukani ukina mu kibuga hagati afasha ba rutahizamu muri KCCA y'iwabo.
Rayon Sports FC iri gushaka uko isinyisha abandi bakinnyi nyuma yuko yasoreje imikino ibanza ya shampiyona ku mwanya wa mbere n’amanota 36, irusha atanu APR FC iyikurikiye.
Iyi kipe yambara Ubururu n'Umweru kandi iri kwitegura imikino y’Igikombe cy’Intwari, aho izahura na Police FC ku mukino wa ½, yakwitwara neza igahura n’izava hagati ya AS Kigali na APR FC.
Ntamba Musikwabo Malick wakoze imyitozo muri Rayon Sports
Eng
RSS 
TANGA IGITECYEREZO