Ubushobozi bucye bwatumye Flame BBC itazakina Icyiciro cya mbere

Kuwa Gatanu tariki ya 24 Mutarama 2025 ni bwo biteganyijwe ko imikino ya shampiyona ya Basketball ya 2025 izatangira gukinwa. 

Byari biteganyijwe ko APR BBC izatangira ikina na Flame BBC yaherukaga kuzamuka mu cyiciro cya mbere nyuma yo kwitwara neza mu cyiciro cya kabiri ariko ntabwo uyu mukino ukibaye.

Flame BBC yamaze kwikura mu cyiciro cya mbere nyuma y'uko ihuye n'ikibazo cy'ubushobozi. Mbere yuko shampiyona itangira buri kipe yo mu cyiciro cya mbere isabwa kwerekana nibura miliyoni 100 Frw izakoresha gusa yo ntabwo yashoboye kuyerekana.

Ubwo bivuze ko kuri ubu shampiyona y'icyiciro cya mbere ya 2025 izakinwa n'amakipe 9 gusa ariyo APR BBC, Patriots BBC, REG BBC, Kepler BBC, Espoir BBC, UGB BBC, Tigers BBC, Orion BBC na Azomco BBC.

Ibi bizatuma shampiyona nirangira mu cyiciro cya kabiri hamanuka ikipe imwe izaba yasoreje ku mwanya wa nyuma ariko hakazazamuka amakipe abiri yitwaye neza mu cya kabiri ubundi amakipe yongere abe 10 nkuko biba biteganyijwe.

Imikino ya shampiyona izatangira kuwa Gatanu Patriots BBC ikina na Azomco BBC saa kumi nebyiri z'umugoroba muri LDK, REG BBC ikina na Orion BBC saa moya z'umugoroba muri Kepler naho Tigers BBC ikina Espoir BBC saa mbili n'iminota 30 muri LDK.

Ni mu gihe muri shampiyona y'icyiciro cya kabiri mu bagabo ho UR Huye izatangira ikina na RP Huye saa kumi nebyiri muri UR Huye.

Flame BBC yikuye muri shampiyona y'icyiciro cya mbere kubera ubushobozi bucye