Ahabanza Imyidagaduro

Ashimwe Michelle yabonye itike yo guhagararira u Rwanda muri Miss Africa

Yanditswe na: Janvier Iyamuremye
Taliki:14/01/2025 9:45 0

Ashimwe Michelle yashyizwe ku rutonde rw’abakobwa 25 babonye itike ibemerera kuzitabira irushanwa rya Miss Africa Calabar 2025. Rihuza abakobwa bo mu bihugu bitandukanye byo ku Isi, ndetse buri mwaka abakobwa banyuranye mu bihugu bagerageza amahirwe.

Kuri uyu wa Kabiri tariki 14 Mutarama 2025, nibwo Miss Africa Production itegura iri rushanwa, yagaragaje urutonde ntakuka rw’abakobwa 25 bemejwe kwitabira iri rushanwa.

Ni urutonde rugaragaraho umukobwa Khadijiatou Ndiaye wo muri Mauritania, Chaimaa Hejam wo muri Morocco, Silvia Ernesto Linha wo muri Mozambique, Delsie Somaes wo muri Namibia, Miriam Abdou wo muri Niger, Sopuruchi Agoauwuike wa Nigeria, Ashimwe Michelle wo mu Rwanda, Aisha Osman Ikow wa Somalia, Kamogelo Matinketsa wa Afurika y’Epfo n’abandi.

Bavuze ko aba bakobwa bazahagararira ibihugu byabo hamwe n’ishema ryinshi, ndetse bazifashisha ubwiza bwabo n’ubumenyi mu kumenyekanisha byisumbuyeho uyu mugabane.

Umukobwa uzambikwa ikamba azamenyekana ku wa 30 Werurwe 2025 mu birori bikomeye bizabera muri Nigeria. Umukobwa wegukanye ikamba, ahabwa amafaranga angana na 25.000$ [Arenga miliyoni 25 Frw] n’imodoka nshya.

Mu 2022, u Rwanda rwaserukiwe na Mugabekazi Ngoga Anaise utarabashije kugira ikamba atahana. Ikamba ryatanzwe mu ijoro ryo ku wa 27 Ukuboza 2022 ryegukanwa na Precious O. Okoye wo muri Nigeria. Bivuze ko umukobwa uzatorwa kuri iyi nshuro azasimbura Precious.

Mu 2021 iri rushanwa ryarasubitswe. Icyo gihe, abategura iri rushanwa basohoye itangazo, bavuzemo ko byaturutse ku ‘bugenzuzi n’inama z’inzego zishinzwe ubuzima muri Nigeria ‘kubera icyorezo cya Covid-19’.

Miss Africa Calabar ni irushanwa rihuza abakobwa batandukanye baturuka mu bihugu bya Afurika rikabera muri Leta ya Cross River yo muri Nigeria ari nayo iritegura. Ryatangiye mu mwaka wa 2016.