Vinicius Junior yasabye imbabazi ku ikosa ryamuhesheje ikaria y'umutuku

Kuwa Gatanu Saa yine z'ijoro nibwo ikipe ya Valencia yari yakiriye Real Madrid kuri Estadio Mestalla mu mukino w'ikirarane cya shampiyona yo muri Espagne nyuma yuko wari warasubitswe kubera ibiza.

Uyu mukino warangiye Real Madrid itsinze ibitego 2 -1 bigoranye dore ko byasabye iminota ya nyuma. Ni ibitego byatsinzwe na Luka Modric ku munota wa 85 ahawe umupira na Jude Bellingham ndetse na Jude Bellingham ku munota wa 90+5 mu gihe icya Valencia cyo cyatsinzwe na Hugo Duro ku munota wa 27.

Ikipe ya Real Madrid yarangije uyu mukino ifite abakinnyi 10 mu kibuga nyuma yuko Vinicius Junior yari yabonye ikarita y'umutuku.

Uyu mukinnyi bigeze ku munota wa 79, umunyezamu wa Valencia, Stole Dimitrievski yamukoze mu bitugu nyuma yuko yari yikubise hasi mu rubuga rw'amahina undi nawe ahagurukana umujinya amusunika   bituma umusifuzi amuha ikarita y'umutuku.

Nyuma y'umukino, Vinicius Junior uzasiba imikino 4 kubera iyi karita abinyujije ku rukuta rwe rwa X yashimiye ikipe kuba yabonye intsinzi ndetse anasaba imbabazi kuba yabatereranye abona ikarita y'umutuku.

Umutoza wa Real Madrid, Carlo Ancelotti yavuze ko umukinnyi we atari akwiye guhabwa ikarita y'umutuku bityo ko bazayijuririra.

Yagize ati "Ntabwo yari ikarita y'umutuku kuri Vinicius Junior ndetse tuzanajurira. Umunyezamu yamusunitse na Vinicius agira icyo akora. Bose bagombaga kubaha amakarita y'imihondo".

Nyuma yuko Real itsinze uyu mukino yahise ifata umwanya wa mbere ku rutonde rwa shampiyona n'amanota 43 aho ikurikiwe na Atletico Madrid ifite amanota 41 gusa ikaba igifite umukino w'ikirarane mu gihe FC Barcelona yo iri ku and mwanya wa 3 n'amanota 38.

Vinicius Junior asunika umunyezamu wa Valencia bikamuviramo guhabwa ikarita y'umutuku 

Vinicius yasabye imbabazi nyuma yo guhabwa ikarita y'umutuku