Urwego rw'Amerika rw'ubugenzacyaha (FBI) rwemeje amakuru y'igitero cyagabwe mu mujyi wa New Orleans muri Leta ya Louisiana ku Bunani, aho abantu 15 bapfuye, abandi 35 bagakomereka, mu gikorwa cyakozwe na Shamsud-Din Jabbar w'imyaka 42 wahoze ari umusirikare wa Amerika.
Inkuru dukesha ikinyamakuru CBSNews.com ivuga ko byemejwe ko Jabbar yifashishije ikamyo ya 'pickup' ayinyuza mu mbaga y'abantu bari mu muhanda mu gace kazwi nka French Quarter, gahuriramo ba mukerarugendo benshi.
Nyuma y'aho, Jabbar akimara gukomeretsa abantu benshi, yafashe imbunda maze atangira kurasa abantu ndetse ntiyatinye no kurasa abapilosi, ariko pilisi yaje kumurasa ahita apfa.
FBI yatangaje ko mu modoka ya Jabbar habonetse ibendera ry'umutwe w'iterabwoba wa leta ya kisilamu (IS), ndetse hakaba hari harimo ibiturika bibiri. Umuyobozi wungirije wa FBI, Alethea Duncan, yavuze ko FBI yemeza ko Jabbar atari we wenyine wabikoze, ariko iperereza rikaba rikomeje.
Dr. Dwight McKenna, umutegetsi ushinzwe iperereza ku bibazo by'impfu mu mujyi wa New Orleans, yemeje ko umubare w'abapfuye ari 15. Yavuze ko bizafata iminsi myinshi kugira ngo hakorwe amasuzuma ya 'autopsy' ku mpfu ndetse hanatangazwe imyirondoro y'abishwe. Mu bishwe harimo Martin "Tiger" Bech, wahoze ari umukinnyi w'umupira w'amaguru muri kaminuza ya Princeton.
Icyo gitero cyabaye ahagana saa cyenda n'iminota 15 z'ijoro (03:15) ku isaha yaho, mu gace kazwiho gukundwa n'abantu benshi mu gihe cy'ijoro. Anne Kirkpatrick, umukuru wa polisi mu mujyi wa New Orleans, yavuze ko Jabbar yashakaga kugonga abantu benshi bashoboka.
Shamsud-Din Jabbar yavukiye i Texas kandi yahoze ari umusirikare mu ngabo z'Amerika. Uko iperereza rikomeza, abashinzwe umutekano basaba abaturage gukomeza kwitonda no gutanga amakuru ashobora gufasha mu kumenya byinshi kuri iki gitero.
Umwanditsi: KUBWIMANA Solange
Eng
RSS 
TANGA IGITECYEREZO