Gapapu! Turatsinze Olivier wari witezwe muri Patriots BBC yisanze muri Kepler BBC

Ibi bibaye nyuma y’uko Patriots BBC itabashije kubahiriza ibisabwa ngo uyu mukinnyi ave muri Espoir BBC, ikipe Turatsinze Olivier yari amaze igihe akinira.

Turatsinze Olivier ni umwe mu bakinnyi bakunzwe cyane muri shampiyona y’u Rwanda, aho yahize abandi mu gutsinda amanota menshi mu 2023  angana na 507, ndetse anatorwa nk’umukinnyi mwiza w’umwaka. Afite uruhare rukomeye mu gufasha Espoir BBC kwegukana umwanya wa Gatatu muri shampiyona yabanjirije iheruka.

Kepler BBC, yasoreje ku mwanya wa Kane mu mwaka ushize wa shampiyona, ikomeje kwiyubaka ngo ihangane n’amakipe akomeye nka APR BBC, Patriots BBC na REG BBC. Mu minsi yashize, iyi kipe yasinyishije Kaje Elie, wahoze muri APR BBC, none yongereye imbaraga isinyisha Turatsinze Olivier, umukinnyi ukomeye kandi wifashishwa n’Ikipe y’Igihugu mu mikino y’abakinnyi batatu (3x3).

Turatsinze Olivier yagaragaje ko guhitamo Kepler BBC bishingiye ku cyizere yagiriwe n’ubuyobozi bwayo no ku mahirwe yo gukomeza kuzamura urwego rwe. Icyakora, iki cyemezo cyatumye Patriots BBC, ikipe yari yaramwegereye mbere, itakaza amahirwe yo kubona umukinnyi wakabafashije guhangana na APR BBC, ikipe yabatwaye igikombe cya shampiyona giheruka.

Mu mwaka ushize, Patriots BBC yari yasoje ku mwanya wa kabiri, inyuma ya APR BBC, mu gihe REG BBC yabaye iya gatatu. Kepler BBC yaje ku mwanya wa kane ariko irerekana icyizere cyo guhatana cyane muri shampiyona itaha kubera abakinnyi bashya b’abahanga iri kugenda isinyisha.

Kugura Turatsinze Olivier ni indi ntambwe ikomeye kuri Kepler BBC mu kwiyubaka. Uyu mukinnyi afite inararibonye n’ubuhanga, akaba azongera imbaraga mu busatirizi bw’iyi kipe mu gihe shampiyona yitegurwa gutangira.

Byitezwe ko Turatsinze azahura na bagenzi be bashya mu mpera z’iki cyumweru aho imyitozo izatangira, mu gihe abafana ba Kepler BBC biteguye kubona ibyo uyu mukinnyi azanye mu ikipe yabo.

Turatsinze Olivier wari utegerejwe muri Patriots BBC yisanze muri Kepler BBC