Ingengo y’Imari y’u Rwanda yageze kuri Miliyari 4,806 Frw mu Gihembwe cya Gatatu cya 2024

Ubukungu bw’u Rwanda bwazamutseho 8.1% mu Gihembwe cya Gatatu cya 2024. Ni raporo y'Ikigo cy'Igihugu cy'Ibarurishamibare (NISR) yasohowe kuri uyu wa Kabiri yerekana ko umusaruro mbumbe w’imbere mu Gihugu ubarirwa agaciro ka miliyari 4,806 Frw uvuye kuri 4,246 Frw mu gihembwe cya gatatu cya 2023.

Iyi raporo igaragaza ko urwego rwa serivisi rwagize uruhare rungana na 49%, ubuhinzi bugira 24%, mu gihe urwego rw’inganda rwagize uruhare rungana na 20%, imisoro yinjijwe igira 7%.

Impuzandengo z’ibihembwe bitatu bya mbere bya 2024 igaragaza ko ubukungu bw’u Rwanda bwazamutse ku kigero cya 9.2%, ibyo Minisitiri w’Imari n’Igenamigambi, Yusuf Murangwa, ahamya ko ari “Ikigero cyiza, gitanga icyizere ku bukungu bwacu.”

Minisitiri Murangwa yavuze ko nubwo izamuka ry’ubukungu bw’u Rwanda mu gihembwe cya gatatu ryari rito ugereranyije n’ibihembwe bibiri byaribanjirijwe, ariko “ikigero cya 8% ni cyiza cyane ku bukungu.”

Uyu muyobozi kandi yamaze impungenge abahuza iri zamuka rito n’izamuka ry’ibiciro ku masoko ndetse n’itakazagaciro k’ifaranga ry’u Rwanda ugereranyije n’idolari, avuga ko ntaho bihuriye.

Ati: “Nta sano turi kubona kubera ko umusaruro w’ubukungu bw’u Rwanda ntabwo ari mubi, izamuka ry’ibiciro ntabwo rikabije ndetse n’itakazagaciro k’ifaranga ry’u Rwanda ryabwo rikabije.”

Yongeyeho ko ukurikije uko ubukungu bwazamutse, bitanga icyizere cy’uko mu 2025 buzarushaho kwitwara neza. Ati: “Nta mpinduka turi kubona zidasanzwe, ubukungu bw’u Rwanda bwakabaye buzaba bwiza mu 2025… impuzandengo ihagaze kuri 9.2%, imibare ikomeje gutya, ubukungu bwazamuka ku kigero kiri hejuru 8% cyangwa 9%.”

Muri rusange, umusaruro w’urwego rw’ubuhinzi wazamutse ku kigero cya 4% muri iki gihembwe ugereranyije n’igihembwe cya gatatu cya 2023, urw’urwego rw’inganda uzamuka kuri 8%, mu gihe uw’urwego rwa serivisi wazamutse ku kigero cya 10%.