Ibyo gukosora ni byo byoroshye, ibikomeye biri ku murongo! Amashyi ku musaruro w’umutoza w’amavubi

Nyuma y’uko Torsten Frank Spittler atangaje ko azasezera ku gutoza ikipe y’igihugu "Amavubi", abanyarwanda banyuranye batangiye gusaba ko yakongera amasezerano cyane ko yatangiye urugendo rwo kubaka ikipe y’igihugu itsinda kandi igahangamura amakipe akomeye.

KuvaTorsten Frank Spittler yatangira gutoza ikipe y’igihugu y’u Rwanda, Amavubi, yatumye icyizere kigaruka mu banyarwanda, bamwe bari baracitse ku bibuga bagaruka gushyigikira ikipe yabo.

Abanyarwanda babona byagorana kubona undi mutoza wakubaka icyizere cyo gutsinda mu ikipe y’igihugu mu gihe Umudage Torsten Frank Spittler yareka gutoza amavubi.

Mu mikino u Rwanda rwakinaga mbere y’uko Torsten Frank Spittler agera mu Rwanda, wasangaga nta gahunda yo gutsinda ihari kuko u Rwanda rwakinaga rwugarira nta gahunda yo gushaka ibitego ihari. 

Benshi bibeshaga ko u Rwanda rudatsindwa ibitego byinshi kubera ko rwakinaga rwugarira ariko nta buryo bwo gushaka ibitego rwaremaga.

Kuva Torsten Frank Spittler yatangira gutoza Amavubi, ubu abanyarwanda basigaye barazamuye icyizere ku buryo buri rushanwa  u Rwanda rwazaryitabira cyane ko igikombe cya Africa cyaruciye mu myanya y’intoki.

Ubu Amavubi atozwa na Torsten Frank Spittler mu mukino yo gushaka itike y’igikombe cy’Isi ni aya mbere mu itsinda ririmo ibihugu nka Benin, Nigeria, Afurika y’Epfo, Zimbabwe na Lesotho.

Mu mikino yo gushaka itike yo kujya mu gikombe cya Afurika ho, Amavubi yabuze itike ari ku mwanya Gatatu mu itsinda ririmo ibihugu nka Nigeria, Benin na Libya ariko Nigeria na Benin Nibyo byagiye mu gikombe cya Africa.

Kugeza ubu mu mikino Torsten Frank Spittler amaze gutoza Amavibi ni 14. Yatsinzwe ine, atsinda imikino 6,anganya indi ine. Mu mikino 14 ihwanye n’amanota 42 Torsten Frank Spittler amaze gusaruramo amanota 22.

Umukino wa mbere wa Torsten Frank Spittler atoza ikipe y’igihugu y’u Rwanda, Amavubi yakinnye na Zimbazwe. Wari umukino wo gushaka itike yo kujya gikombe cy’Isi cya 2026 kizabera USA, Canada na Mexico, icyo gihe umukino wabereye nkuri Stade ya Huye, warangiye amakipe yombi anganya ubusa ku busa.

Umukino wa Kabiri Torsten Frank Spittler yatoje Amavubi, nawo wari uwo gushaka itike y’igikombe cy’Isi. Uwo mukino ntabwo uzava mu mitwe y’abanyarwanda kuko u Rwanda rwatsinze Afurika  y’Epfo ibitego bibiri ku busa kuri Stade ya Huye.

Umukino wa Gatatu Torsten Frank Spittler yatoje Amavubi wari uwa gicuti wabereye muri Madagascar, uaho u Rwanda rwanganyijemo na Botswana ubusa ku busa.

Umukino wa Kane nawo wari uwa gicuti wabereye  muri Madagascar, u Rwanda rwatsinze Madgascar ibitego bibiri ku busa.

Umukino wa Gatanu Torsten Frank Spittler atoza ikipe y’igihugu y’u Rwanda Amavubi ntabwo wagenze neza kuko Benin yamutsinze igitego 1-0 mu mikino yo gushaka itike yo kuzakina igikombe cy’Isi cya 2026, ni umukino wabereye muri Cote d’Ivoire.

Umukino wa Gatandatu Torsten Frank Spittler atoza Amavubi, yakomeje akazi ko kurimbagura amakipe y’ibihugu maze kuri iyi nshuro atsinda ikipe y’igihugu ya Lesotho mu mukino wabereye muri Afurika y'Epfo mu gushaka itike yo kuzakina igikombe cy’Isi.

Umukino wa Karindwi ku mutoza Torsten Frank Spittler utoza Amavubi, wari uwo gushaka itike y’igikombe cya Afurika kizabera muri Morooc mu2025. Ni umukino u Rwanda rwanganyije na Libya igitego 1-1.

Umukino wa Munani kuri Torsten Frank Spittler atoza Amavubi, ni uwahuje u Rwanda na Nigeria mu gushaka itike y’igikombe cya Afurika cya 2025. Uwo mukino wabereye kuri Stade Amahoro warangiye Torsten Frank Spittler afashije u Rwanda kunganya na Nigeria ubusa ku busa.

Umukino wa 9 kuri Torsten Frank Spittler atoza Amavubi, twakwemeza ko ariwo mukino mubi yagize kuva yatangira gutoza u Rwanda. Wari umukino wo gushaka itike y’igikombe cya Afurika ubwo Benin yatsindaga u Rwanda ibitego bitatu ku busa maze abanyarwanda bagatakaza icyizere cyo gukomeza.

Umukino wa 10 kuri Torsten Frank Spittler  atoza Aamvubi, wabaye kuri uyu wa Kabiri ku itariki 15 Ukwakira ubwo yafashije u Rwanda gutsinda ikipe y’igihugu ya Benin mu mikino yo gushaka itike yo kujya mu gikombe cya Afurika cya 2025 muri Morocco.

Umukino wa 11 Torsten Frank Spittler atoza Amavubi wari uwo gushaka itike y’igikombe cya Africa CHAN ariko u Rwanda rwatsinzwe na Djibouti igitego kimwe ku busa. Umukino wa 12 Torsten Frank Spittler atoza Amavubi ayafasha kwishyura Djibouti ayitsinda ibitego bitatu ku busa, u Rwanda rusezerera Djibouti.

Umukino wa 13 Torsten Frank Spittler atoza Amvubi ni undi mu mikino mibi yamwitambitse, kuko yatsinzwe na Libya igitego kimwe ku busa mu mukino wa Gatanu wo gushaka itike y’igikombe cya Africa, ukaba ari nawo mukino benshi bahamya ko witambitse u Rwanda ku nzozi zo kwitabira igikombe cya Africa ku nshuro ya kabiri.

Umukino wa 14 ku ruhande rwa Torsten Frank Spittler atoza Amvubi byari ibirori ubwo yafashe ikipe y’igihugu ya Nigeria akayitsindira iwabo. Nubwo u Rwanda rutigeze rujya mu gikombe cya Africa, gutsinda ikipe y’igihugu ya Nigeria byaciye amarenga ko u Rwanda rugeze ku rwego rwo guhangamura amakipe y’ibihugu akomeye.

Kugeza ubu mu mikino Torsten Frank Spittler amaze gutoza Amavibi ni 14. Yatsinzwe ine, atsinda imikino 6, anganya indi ine. Mu mikino 14 ihwanye n’amanota 42 Torsten Frank Spittler amaze gusaruramo amanota 22.

Mu mikinire ye, Torsten Frank Spittler yaranzwe no gutsinda ibihugu bikomeye ubwo imikino itatu amaze gukina n’ibihugu bya mbere bikomeye muri Africa, yatsinze imikino ibiri anganya umukino umwe. Yakinnye imikino ibiri Na Nigeria ayitsinda umukino umwe nganya nayo undi mu gihe yatsinze ikipe y’igihugu ya Africa y’epfo.

Mu mikino ine amaze gutsindwa, Torsten Frank Spittler yatsinzwe imikino ibiri na Benin, atsindwa umwe na Djibouti n’undi yatsinzwemo na Libya.

Mu bimaze kugaragara mu ikipe y’igihugu y’u Rwanda Amavubi itozwa na Torsten Frank Spittler, ni uko yamaze kubaka igitinyiro ku bihigu bikomeye kugeza ubu akaba nta kifuza kuba cyakina n’u Rwanda.

Igisigaye gukosoka ku ruhande rw’u Rwanda rutozwa na Torsten Frank Spittler, ni ukwiga amayeri yo gutsinda ibihugu bitaratera imbere mu mupira w’amaguru muri Africa, cyane ko aribyo biri gukura intsinzi ku Rwanda.

Abasesenguzi ba ruhago bahuriza ku kuba u Rwanda Torsten Frank Spittler amaze kurugeza ku rwego rwo gutsinda buri mukino, ahubwo bishobora kuba bipfira ku kuba amakipe adategurwa mu buryo bungana, ugasanga hari n’amakipe asuzugurwa, maze agatsinda u Rwanda mu buryo butari bwitezwe. 

Ibikubiye mu musaruro w'umutoza w'u Rwanda Trosten Frank Spitller kuva yatangira gutoza Amavubi

Umutoza w'Amavubi amaze kuyageza ku rwego rwo gutsinda ibihugu bikomeye muri Africa