Amerika: Hubatswe ikibumbano cy'Urwibutso rwa Jenoside yakorewe Abatutsi

Muri iyi nama, niho hatangarijwe ko Kaminuza ya Sacramento State yo muri Amerika yubatse ikibumbano cy'Urwibutso rwa Jenoside yakorewe Abatutsi, bikaba biteganijwe ko kizafungurwa ku mugaragaro muri Mata 2025.

Iyi Nama Mpuzamahanga iri kubera muri iyi kaminuza igamije ku kwerekana ububi bwa Jenoside, aho abanyeshuri basobanuriwe uko Jenoside itegurwa igashyirwa mu bikorwa n’ingaruka zayo mu gusenya umuryango. 

Minisitiri w’Ubutabera akaba n’Intumwa Nkuru ya Leta, Dr Ugirashebuja Emmanuel yagarutse ku mateka ya Jenoside yakorewe Abatutsi, uko yateguwe ikanashyirwa mu bikorwa ryayo, ariko anagaruka ku budaheranwa n’ubumwe n’ubwiyunge byaranze abanyarwanda mu myaka 30 ishize Jenoside yakorewe Abatutsi ihagaritswe. 

Yatangaje ko kwibuka Jenoside yakorewe Abatutsi n’izindi zabaye hirya no hino ku Isi, ari ukugira ngo ibiragano bishya cyangwa ababayeho nyuma y’ayo mahano bamenye ukuri, bityo bafate inshingano zo guharanira ko ibyabaye bitazongera kubaho ukundi. 

Ati: “Uyu munsi, ¾ by’Abanyarwanda bose bari munsi y’imyaka 35. Ibi bisobanuye ko hafi ya bose bari bataravuka cyangwa bari bakiri bato muri Jenoside yakorewe Abatutsi ku buryo batibuka ayo mahano yabaye."

Yakomeje agira ati: "Rero twese dufite inshingano zo guhererekanya urwo rwibutso ku biragano bizaza kugira ngo ayo mahano yabaye atazongera kuba ukundi kandi bitari Jenoside yakorewe Abatutsi gusa ahubwo n’izindi.”

Minisitiri Dr Ugirashebuja yavuze ko binababaje ku kuba Isi isa n'itarafashe amasomo ahagije kuri Jenoside yakorewe Abatutsi, ku buryo na n’ubu hari ahakigaragara ingengabitekerezo ya Jenoside. 

Yakomeje avuga ko abakiga politike, iyubahirizwa ry’amategeko n’ibindi bakwiye kwifatanya n’abari mu mirimo kurwanya ingengabitekerezo ya Jenoside iyo ariyo yose, asaba by’umwihariko ko abiga amategeko mpuzamahanga n’abari mu mwuga ubu bakwiye guharanira kurwanya abahakana n'abapfobya Jenoside yakorewe Abatutsi mu 1994.

Kaminuza yo muri Amerika yubatse ikibumbano cy'Urwibutso rwa Jenoside yakorewe Abatutsi

Byatangarijwe mu Nama Mpuzamahanga ya 6 yiga kuri Jenoside

Minisitiri w'Ubutabera, Emmanuel Ugirashebuja yasobanuriye abakiri bato akamaro ko kwibuka