Ruswa y'igitsina no kwitwa abatinganyi mu bikibangamira abakobwa bavanga imiziki - DJ Nessa yabivuye imuzi

Uko iminsi igenda ihita imyuga itandukanye yatinywaga n’ab’igitsina gore igenda iyobokwa na benshi ndetse hari abamaze guca akagozi kari kameze nka kirazira kuri imwe muri yo harimo n’uwo kuvanga imiziki.

Ntabwo hashize igihe kinini benshi mu bakobwa binjiye muri uyu mwuga ndetse utereye amaso nko mu myaka itanu ishize wasangaga abawukora wababarira ku ntoki ariko ubu siko biri.

Kuri ubu ni umwuga utunze benshi barimo n’abakobwa bamaze kwitinyuka no kumva ko bawukora batitaye kuri bamwe bashobora kubita amazina atandukanye.

DJ Nessa ubusanzwe yitwa Ikirezi Vanessa, yavutse ku wa 19 Kanama 2002. Yize Software Development. Avuga ko impamvu yahisemo kuvanaga imiziki ari uko yakuze afite inzozi zo kuzaba icyamamare.

Iyo umubajije ikintu cyamugoye agitangira aka kazi akubwira ari ugutaha amajoro no kuba hari abantu bagiye bashaka kumufatirana ko akiri kuzamuka.

Mu kiganiro cyihariye yagiranye na InyaRwanda, DJ Nessa yatangaje ko ari urugamba rutoroshye abakobwa babarizwa mu mwuga wo kuvanga imiziki barwana, ariko kandi ashimangira ko biterwa n’uko buri wese arurwana.

Yavuze ko zimwe mu mbogamizi aba-DJs b’abakobwa bahura na zo harimo ko nk’iyo bagitangira bibagora cyane kubyumvisha abantu kuko baba batekereza ko bagiye kwishora ngeso mbi nk’ubusinzi n’izindi, kuba abenshi babita abatinganyi bitewe n’imyambarire yabo, ndetse no kuba hari ababanza kubaka ruswa y’igitsina kugira ngo babahe akazi.

DJ Nessa wahishuye ko na we yigeze gusabwa iyi ruswa y’igitsina asobanura uko iki kibazo giteye yagize ati: “Hari igihe ujya gusaba nk’umukire akazi na we akagusaba ibindi akakubwira ati ‘kugirango nkuhereze akazi, urabanza umpereze nanjye ibyishimo’.”

Abajijwe niba abakobwa b’aba-DJ bakunda guhura n’iki kibazo yasubije ati: “Cyane, cyane abenshi barabisabwa.”

Yasobanuye ko we adashobora dutanga ruswa y'igitsinda kuko yaba yishe akazi. Mu mwaka umwe n'amezi ane amaze avanga imiziki, yavuze ko yatswe iyi ruswa inshuro imwe gusa akinjira mu uyu mwuga, avuga ko impamvu abona ibitera ari irari ry'abagabo.

Nessa yatangaje ko nubwo hari abantu batumva neza ibijyanye n'uyu mwuga, ariko ari akazi nk'akandi ndetse kabasha gutunga ugakora. Yitanzeho urugero avuga ko hari igihe yatumiwe gucuranga muri Kenya akishyurwa miliyoni 3 Frw, ahishura ko mu gihe gito amaze akora uyu mwuga amaze kwinjiza arenga miliyoni 20 z'amafaranga y'u Rwanda.

Yavuze ko mu kazi bakora kugira ngo ubashe gutera imbere bisaba kwimakaza umuco wo kwizigama kuko hari igihe ushobora no kumara ukwezi nta kiraka ubona, avuga ko bisaba kwiyamamaza kugira ngo ubone akazi.

Dj Nessa yahishuye ko ubwiza n'ikimero gusa atari byo bituma abakobwa bavanga imiziki bahabwa akazi nk'uko benshi babitekereza, asobanura ko iyo ufite impano n'abantu benshi bashobora kugukurikira aho ugiye gucuranga, ugahabwa nta kabuza.

Yatangaje ko umu-DJ wa mbere w'umukobwa yemera ko azi gucuranga kurusha abandi mu Rwanda ari Dj Ira, ahishura ko abandi abona nta mbaraga bashyira mu kwiyungura ubumenyi. 

Ati: "Hari ukuntu umuntu ajya mu bu-DJ, yabona atangiye kubona ibiraka ahantu harenze akumva yagafashe, akarekera gukora imyitozo ngo agire n'ubumenyi burenze."

Ku byerekeranye n'ubuzima bw'urukundo, Dj Nessa yatangaje ko amaze imyaka ibiri nta mukunzi afite kuko 'bigoye gutunga umukunzi muri aka kazi.' 

Akomoza ku mpamvu yigeze gushaka kureka aka akazi, yagize ati: "Nkibitangira nakoze nk'ibiraka bitatu byose banyambura [...] uzi kumara amajoro atatu ukora ugenda witanze wanashoye amafaranga yawe wakodesheje n'ibyuma bakakwambura?"

Nubwo harimo izi mbogamizi zose, Dj Nessa yatangaje ko umwana we aramutse amugejejeho ikifuzo cy'uko ashaka kuba umu-Dj yamushyigikira mu gihe cyose yaba afite impano. 

Mu nama yamuha mbere ngo kumwemerera kwinjira muri uyu mwuga harimo kwirinda ibiyobyabwenge kuko uwabigiyemo atabasha gutera imbere, kugira ikinyabupfura mu kazi, no gukunda ibyo akora agahora yiyungura ubumenyi.

Uyu mukobwa wakuze akunda umuziki, yatangiye kuvanga imiziki guhera muri Nzeri mu 2022. Mu Rwanda afatira urugero ku barimo DJ Ira na DJ Toxxyk. Hanze akunda umukobwa witwa DJ Ayane. 

Amaze gucuranga mu tubyiniro dutandukanye na za Hotel ndetse no hanze ya Kigali nka Musanze na Gisenyi. Yacuranze no muri Kenya, aho yacuranze indirimbo yitwa 'Igitangaza' ya Bruce Melodie, Juno Kizigenza na Kenny Sol, ikamuhesha agahimbazamusyi k'amafaranga y'u Rwanda agera ku 800,000.

Dj Nessa afite intego yo gukora cyane agahembwa amafaranga menshi arenze cyane ku yo ahembwa uyu munsi, akagera nko kuri miliyoni 5 Frw mu cyumweru kimwe. 

DJ Nessa yatangaje ko amaze kwinjiza arenga miliyoni 20 Frw mu mwaka umwe n'amezi macye amaze avanga imiziki

Yavuze kuri ruswa y'igitsina ikunze gusabwa abakobwa bagitangira umwuga wo kuvanga imiziki

Dj Nessa yavuze ko ashengurwa n'ababita abatinganyi bitewe n'imyambarire yabo

Afite gahunda yo gutangira gushyira ibikorwa bye kuri YouTube

">Kanda hano urebe ikiganiro cyose twagiranye na DJ Nessa

">