Yatangiye bisa nk’inzozi! Byinshi kuri Gentil Iranzi, impano nshya muri Gospel Nyarwanda – VIDEO

Gentil Iranzi, ni umuramyi mushya ukiri umunyeshuri muri Kaminuza y’u Rwanda. Uyu musore ukunda Imana, yanditse indirimbo ya mbere ubwo yigaga mu mashuri yisumbuye, inshuti ze zimugira inama yo gutangira gushyira ahagaragara ibihangano bye ariko muri we akumva ijwi rimubwira ko atari cyo gihe.

Ageze muri Kaminuza, nibwo yanditse indirimbo yise ‘Icyaremwe gishya’ yashyize hanze mu minsi ibiri ishize. Ni indirimbo ikubiyemo urugendo rw’agakiza rw’uyu muramyi, ariko yizera ko ari inkuru ahuriyeho n’abandi bizera bamaze kwizera Yesu Kristo nk’Umwami n’Umukiza w’ubugingo bwabo.

Mu kiganiro na InyaRwanda, Gentil yasobanuye uko yaje gufata icyemezo cyo gusohora iyi ndirimbo nyuma y’igihe ayanditse. 

Ati: “Ku nshuro ya mbere narayiririmbye bisanzwe mbona ‘feedback’ zitandukanye abantu bari aho barayikunda abandi nkumva bibateye gufatanya nanjye guhimbaza Imana, nibwo numvise noneho ko cyaba ari cyo gihe ngo nsuke imvamutima zanjye hanze.”

Yatangaje ko gutangira urugendo rw’ubuhanzi byasaga nk’inzozi kuri benshi, nyamara we yiyemeje gukurikira umuhamagaro we ndetse ashaka n’ababimufashamo kugeza bishobotse.

Ati: “Natangiye uyumushinga ari bintu bisa nk’inzozi ku bantu benshi kuko bihenze kandi ndi umunyeshuri, ariko ngewe natumbiraga Kristo kuko numvaga ko aricyo ampamagarira gukora. Negereye inshuti zange zitunganya indirimbo, abacuranzi mbagezaho igitekerezo cyange bakunda indirimbo zange bemere kuzabimfashamo.

Mu by'ukuri habayemo byinshi abenshi ntibanabyumvaga kugeza ku munsi wa nyuma ariko nk’uko nabyizeraga Imana irabikora. Mvuze ko ari mbaraga zange naba mbeshye pe.”

Iyi ndirimbo yamutwaye imbaraga nyinshi, yayituye abantu bagiriwe ubuntu nk’ubwo na we yagiriwe, umuntu utarizera Kristo ubura amahoro ‘kuko natwe ari ko twahoze ariko twagera ku musaraba tukaruhuka tukabona amahoro,’ ndetse n’abantu bibwira ko imirimo n’amategeko byabasha kubakiza, abibutsa ko Kristo ari we wenyine ushobora kubaruhura.

Yavuze ko nyuma y’iyi ndirimbo ‘Icyaremwe gishya,’ ateganya gushyira hanze izindi ndirimbo zikiri inyuma ziri gutunganywa, kandi yizeye ko zizahembura imitima y’abazayumva.

Gentil Iranzi yasabye Abanyarwanda kumwakira no kumushyigikira mu buryo bwose haba mu bifatika, kumusengera ndetse no kumukurikira ku mbuga nkoranyambaga akoresha, kugira ngo abashe kubona uko akomeza urugendo abagezaho ibindi bihangano byiza abahishiye.

Gentil Iranzi yinjiranye mu muziki indirimbo igaruka ru rugendo rwe rw'agakiza

Yasabye amaboko kugira ngo abashe gukomeza gukora icyo Imana imuhamagarira

Ni umuramyi mushya uri kubifatanya n'amasomo muri Kaminuza y'u Rwanda

Reba hano amashusho y'indirimbo "Icyaremwe Gishya" y'umuramyi Gentil Iranzi