Libya yihimuye ku ikipe y'igihugu ya Nigeria iyiheza ku kibuga cy'indege

Ku wa Gatanu w'icyumweru gishize ni bwo ikipe Nigeria yari yakiriye Libya inayitsinda igitego 1-0 mu mukino ubanza mu gushaka itike y'igikombe cy'Afurika cya 2025 kizabera muri Morocco.

Ubwo ikipe y'igihugu ya Libya yari muri iki gihugu yavuze ko yafashwe nabi ndetse na kapiteni wayo Faisal Al-Badri yavuze ko impuzamashyirahamwe y'umupira w'amaguru ku mugabane w'Afurika, CAF, ikwiye kugira icyo ibikoraho.

Nyuma y'ibyo, Libya nayo yihimuye ku ikipe y'igihugu ya Nigeria. Ku Cyumweru Libya yahisemo kuyobya indege y'ikipe y'iki gihugu aho kugwa i Benghazi ahazabera umukino wo kwishyura ahubwo igwa i Tripoli.

Abakinnyi b'ikipe y'igihugu ya Nigeria bagumye ku kibuga cy'indege bagira ngo bashake ibyangombwa by'inzira bibajyana i Benghazi ariko babura ababibaha kubera ko bari bagiye gufata amafunguro.

Nyuma yo kuguma ku kibuga cy'indege amasaha arenga abiri iyi kipe y'igihugu yahisemo kugenda n'imodoka ikora urugendo rw'amasaha 4.

Kuwa Kabiri Saa tatu z'ijoro ni bwo biteganyijwe ko ikipe y'igihugu ya Libya izakina na Nigeria mu mukino wo ku munsi wa kane wo mu itsinda D.

Ikipe y'igihugu ya Nigeria yahejejwe ku kibuga cy'indege