Ibintu 5 byo kwitega mu kiganiro mpaka cya Trump na Kamala Harris gitegerejwe na benshi

Uwavuga ko bitari byoroshye ko Donald Trump na Kamala Harris bemeranya gukora ikiganiro mpaka, ntiyaba abenshye kuko bombi babanje kutemeranya itariki bazagikoreraho ndetse hazamo nuko batumvikanaga kuri televiziyo bagikoreraho.

Trump yifuzaga ko iki kiganiro mpaka cyabera kuri televiziyo ya Fox News gusa Harris abitera utwatsi kuko iyi televiziyo ishyigikiye Trump, ubwo uyu mugore yasabaga ko cyabera kuri CNN, Trump nawe yarabyanze avuga ko iyi televiziyo ikunze kumusebya ko atazongera kuhagirira ikiganiro.

Byaratinze aba bombi bahuriza ku itariki 10 Nzeri 2024 ariyo uyu munsi aho bari bukore ikiganiro mpaka kuri televiziyo mpuzamahanga ya ABC News ku isaha ya Saa Tatu z'ijoro. Ni ikiganiro kiri bumare iminota 90 yose buri umwe aburanya undi maze abantu bakihera ijisho uri burushe undi.

Dore ibintu 5 byo kwitega mu kiganiro mpaka cy'aba bakandida bari guhatana ku mwanya wa Perezida wa Leta Zunze Ubumwe z'Amerika:

1. Baragaruka ku kibazo cy'ubukungu

Hashize igihe abanyamerika bataka ikibazo cy'ubukungu bukomeje gusubira inyuma ndetse mu minsi ishije Elon Musk umuherwe wa mbere Isi ifite, yavuze ko nihatagira igikorwa mu maguru mashya, Amerika iri bujye mu izahara ry'ubukungu bwatangiye kuba ikibazo kuva mu 2017/

Mu kiganiro mpaka cya Donald Trump na Kamala Harris hitezweko bombi bagaragaza gahunda yabo yo gukemura ikibazo cy'ubukungu. Ni mu gihe Kamala kuva yatangira kwiyamamaza avuga ko natorwa azongera imisoro byumwihariko abafite ubushobozi bwinshi bakazajya aribo batanga umusoro uri hejuru ugereranije n'abakene nubwo nabo umusoro wabo uziyongera.

Donald Trump we ariko siko abibona kuko yavuze ko niyongera gutorwa azagabanya imisoro ku bantu bose. Ibi biri mu byatumye batangira kumuha amahirwe y'uko yatsinda Kamala kuko abanyamerika benshi bifuza igabanyuka ry'imisoro. Muri iki kiganiro rero bombi baraza gusobanura birambuye ingamba bafite ku bukungu.

2. Ikibazo cy'abimukira

Ingingo itegerejwe na benshi ni igaruka birambuye ku kibazo cy'abimukira gihangayikishije Amerika. Hitezwe ko Trump na Kamala bari buvuge igisubizo kuri iki kibazo kimaze igihe kigarukwaho yewe na Perezida Biden agiye kurangiza manda ye ntacyo agikozeho.

Kuva kera na kare Trump yatorerwa kuba Perezida wa 45 wa USA, ni kenshi yavuze ko adashaka abimukira muri iki gihugu, yewe yigeze no kuvuga ko agiye kubaka urukuta runini rubuza abo muri Mexique kwinjira muri iki gihugu. Uyu mugabo aherutse kuvuga ko abimukira aribo bateza ibibazo muri Amerika, birimo ubujura, ubwicanyi, n'ibindi.

Hitezwe ko muri iki kiganiro bombi bari bugaragaze icyo bazakora kuri iki kibazo igihe bahawe amahirwe yo kwinjira muri White House. Ni mu gihe Kamala Harris we ashyigikiye ko abimukira bakomeza kwakirwa.

3. Ikibazo cy'uburenganzira bwo gukuramo inda

Kimwe mu bintu bikunze kuvugisha benshi mu bayobozi ba Amerika yewe gikunze kumara amasaha menshi mu nama nshinga mategeko, ni ikibazo cy'uburenganzira bwo gukuramo inda. Hahozeho itegeko ryemerera abagore bose gukuramo inda batifuza gusa mu 2021 ryakuweho.

Gusa muri leta zimwe na zimwe barabyemerewe mu gihe leta nyinshi z'iki gihugu bakuyeho iri tegeko ahubwo bemeza ko gukuramo inda ari icyaha gihanwa n'amategeko. Hitezwe ko Trump na Harris bari bugaragaze uruhande bariho niba bashyigikiye ko abagore bemererwa gukuramo inda cyangwa bikomeza gucibwa.

Mu kiganiro mpaka cyahuje Trump na Biden muri Kamena, bombi bageze kuri iyi ngingo bayemeranyaho bose bavuga ko abagore bakwiriye guhabwa uburenganzira ku bijyanye no gukuramo inda. Birashoboka cyane ko no mu kiganiro cya Kamala na Trump bari buze kwemeranya kuri iyi ngingo kuko bose bavuga ko abagore bakwiriye guhabwa ubu burenganzira.

4. Ese Madame Harris w'umushinja cyaha araza kwibasira Trump wahamwe n'ibyaha 34?

Ikibazo buri wese ari kwibaza mu bamaze iminsi bakurikirana amatora yo muri Amerika, ni ikigaruka ku buryo Kamala Harris wahoze ari umushinjacyaha mukuru ari bwitware imbere ya Trump wahamwe n'ibyaha 34 birimo ibishingiye ku ishimisha mubiri, ruswa, gukoresha amafaranga ya leta mu nyungu ze, gukwiza imvugo z'urwango, guteza imyigaragambyo yahitanye abantu n'ibindi.

Mu kiganiro mpaka gishize, Perezida Biden yabwiye Trump ko ari umunyabyaha adakwiye kwiyamamariza kuyobora Amerika. Benshi baribaza niba Kamala ari buze gukoresha ubuhanga bwe nk'umushinjacyaha akagira ibyo abwira Donald Trump bishobora kumukuraho amanota imbere y'abamushyigikiye.

5. Imvugo bari bukoreshe

Ikindi abantu biteze ni ukureba niba Trump na Kamala bari buganire mu mvugo nziza yiyubashye nta n'umwe uri bubwire undi nabi cyangwa ngo amutuke nk'uko biherutse kuba mu kiganiro gishize hagati ya Biden na Trump.

Hitezwe ko Kamala Harris usanzwe ari intyoza mu kuvuga ari bukoreshe imvugo ziyubashye naho Trump akaza gukoresha imvugo nyandagazi nk'uko yabigenje na mbere hose. Gusa n'ubwo ari uko benshi babitekereza ngo bishobora guhinduka buri umwe akaza kurengera mu mivugire.