Numva narakoze icyo nashakaga – Miss Jojo agaruka ku hahise he mu muziki

Niba umaze igihe ukurikiranira hafi umuziki nyarwanda, uko bias kose wumvise indirimbo nka 'Mbwira Yego', 'Beretirida', 'Tukabyine' yakoranye na Rafiki, 'Siwezi' yakoranye na DNG wo muri Kenya n'izindi zakunzwe ndetse zifatwa nk'izaranze impinduka z'umuziki Nyarwanda zakozwe n’umuhanzikazi Miss Jojo umaze igihe ahinduye umuhamagaro.

Mu kiganiro yagiranye na RBA, Uwineza Iman Josiane wamamaye nka Miss Jojo yavuze ko ahahise he yahakoresheje neza mu mpano Imana yamuhaye, kuko yabashije gutambutsa ubutumwa bwagiriye akamaro sosiyete nyarwanda.

Miss Jojo umaze imyaka isaga 10 ahagaritse umuziki yavuze ko ibihe yanyuzemo akiwurimo abyishimira, aho yagize ati: “Ahahise hanjye ndahishimira. Numva narakoze icyo nashakaga, njye ntangira kuririmba sinari umuntu ukunda kwamamara. Nashakaga gutanga ubutumwa.''

Yavuze ko yishimira ko uyu munsi ari umubyeyi ushobora kwita ku muryango we, ndetse agakora n'akandi kazi gashobora kugirira rubanda nyamwinshi akamaro, avuga ko ahahise he hamwigishije byinshi.

Ati: "Igihe cyarageze numva ubutumwa nagombaga gutanga narabutanze, numva hari urundi rwego rwisumbuye nshaka kubaho. Narakuze, ndi umubyeyi, mfite akandi kazi nkora.''

Miss Jojo yavuze ko kuba ataragarutse mu muziki nyuma y'uko awuhagaritse bikababaza benshi biganjemo abakunze cyane ibihangano bye, byose byatewe n'amahitamo yakoze kandi yumva ko ari yo akwiye ku buzima bwe.

Afatiye ku buzima bwa gisitari yanyuzemo, Miss Jojo yavuze ko umwana w'umukobwa uri mu isi y'imyidagaduro muri iyi minsi atorohewe bitewe n'uko usanga asabwa kugira amahitamo akomeye ndetse rimwe na rimwe bikanamusaba kurekura indagagaciro ze.

Kuri ubu, Miss Jojo Miss Jojo yerekeje amaso ku gufasha abakobwa binyuze mu muryango utegamiye kuri Leta yatangije yise ‘Igikari’.

Akomoza kuri uyu muhamagaro yagize ati: “Umwana w’umukobwa akeneye umuntu umuganiriza mu rurimi yumva. Abato bafite amakuru y’ubwoko bwose. Akazi kacu ni ukubafasha gutoranya ameza mu yo bafite.''

Miss Jojo yagaragaje ko mu nshuro ebyiri "Igikari" kimaze kuba, babona gitanga umusaruro. Ati: "Ubushize twamaranye iminsi 14, nyuma twabahaye igenzura tureba ibyo batahanye. Twaganiriye n’ababyeyi tubabaza niba barabonye impinduka n’icyo babona twanoza.'

Yagarutse ku rwibutso afite ku bikorwa byo Kwamamaza Umukuru w'Igihugu mu bihe byatambutse, avuga ko yari afite umufana mukuru ari we Madamu Jeanette Kagame afata 'nk'umuntu werekanye ko akunda umuziki.'

Ati: "Ni umuntu wanyeretse ko yakunze umuziki naririmbye, ni n'umuntu twaganiriye anjyira inama. Nagize amahirwe yo kuganira nawe, ni we muntu wa mbere wadutoje gutinyuka stage. Ni umuntu bigaragara ko umuziki yawumvaga cyane, n'ubu kandi aracyawumva."

Miss Jojo yashimiye Jeanette Kagame watanze inkunga yo gushyigikira abahanzi kuva kera, amushimira ko n'ubu agikomeje kuba hafi abana b'abakobwa, avuga ko umunsi umwe Imana nibishaka azamutumira mu bikorwa bye na byo byibanda cyane ku buzima bw'abakobwa.

Miss Jojo yavutse mu 1983, amenyekana mu Rwanda ubwo yatangiraga gukora umuziki mu 2006, gusa aza kuwuhagarika mu 2012 atangaza ko agiye mu bindi. Ubu ni umubyeyi ufite umwana n’umugabo bashakanye mu 2017. Ni umwe mu bahanzikazi bazahora mu mitima ya benshi, kubera ibihangano biryoheye amatwi yatanze, mu gihe hari abatekerezaga ko gukora umuziki ku gitsina gore bidashoboka.

Miss Jojo yasobanuye uko afata ahahise he ndetse n'icyo hamusigiye