Mu minsi ishize ni bwo Arsenal ibarizwa mu mujyi wa London yashimangiye ko yasinyishije myugariro ukomoka mu Butaliyani, Riccardo Calafiori waje akanyaga ubwugarizi bwayo.
Ku itariki 19 Gicuransi 2002 ni bwo myugariro Riccardo Calafiori yabonye izuba, aribonera i Roma mu Butaliyani. Ubwo yari afite imyaka itandatu gusa, yinjiye mu mupira w'amaguru, awutangirira mu ishuri ry'abakiri bato rya Petriana Academy, riherereye i Roma mu Butaliyani.
Mu 2010 ubwo Riccardo Calafiori yari amaze kugira imyaka 8, gusa, yagiye mu bakiri bato ba AS Roma, noneho bitangira guca amarenga ko azavamo umukinnyi ukomeye.
Mu mashuri y'umupira w'amaguru, Riccardo Calafiori yakunze gukina asatira izamu anyuze ku mpande by'umwihariko ibumoso.
Mu 2019 ni bwo umunyabigwi wa AS Roma, Francesco Totti wakundaga kureberera abana ba AS Roma, yagiriye inama umutoza ko akinisha Riccardo Calafiori mu bwugarizi. Kuva ubwo yahise ahakina neza birangira bimukurikiranye.
Abakiri bato ba AS Roma, Riccardo Calafiori yamaze imyaka 10 akinana nabo cyane ko yatangiye gukinira AS Roma Academy kuva mu 2010 kugera mu mwaka wa 2020.
Mu 2020 ni bwo Riccardo Calafiori yatangiye guhabwa umwanya muri AS Roma, gusa kubona umwanya wo gukina biba intambara. Kuva mu 2020 kugera mu 2022, yakiniye AS Roma imikino 10 gusa nta gitego yatsinze.
Mu 2022-2023, AS Roma yahisemo gutiza Riccardo Calafiori muri Basel. Akigera muri iyi kipe yazamuye urwego rw'imikinire, kuva ubwo atangira kwifuzwa n'amakipe akomeye mu Butaliyani.
Muri Basel yakinnye imikino 26 mu mwaka umwe gusa, kandi ubwo yari muri Roma yari yarakinnye imikino 10 mu myaka ibiri.
Nyuma yo kurangiza gukina nk'intizanyo muri Basel, Bologna niyo yamuguze na AS Roma, cyane ko byagaragaraga ko gusubira muri AS Roma kubona umwanya wo gukina byari bikigoranye.
Riccardo Calafiori akigera muri Bologna yabaye undi wundi, noneho areka kuvugisha amakipe yo mu Butaliyani, ku Mugabane w'u Burayi hose amakipe acika ururondogoro.
Mu mwaka w'imikino umwe Riccardo Calafiori yakiniye Bologna yayikiniye imikino 30 muri Serie A, ayitsindira ibitego bibiri. Nyuma yo kwitwara neza muri Bologna, byarangiye Arsenal ya Mikel Arteta ariyo yegukanye uyu mukinnyi, ihigitse andi makipe akomeye yamwifuzaga.
Kwegukana Riccardo Calafiori kuri Arsenal, ni umugisha ukomeye cyane cyane ko abatoza bamutoje bahamya ko uyu mukinnyi afite ubuhanga budasanzwe bwo gukina imyanya itatu kandi neza.
Riccardo Calafiori ashoboye gukina mu mutima w'ubwugarizi, ashoboye gukina yugarira anyuze ibumoso ndetse akanashaka ibitego anyuze ku mpande ibumoso.
Mu bwugarizi bwa Arsenal, Riccardo Calafiori azajya afatanya na Gabriel Magalhaes, Jurrien Timber, Jakub Kiwol, Takehiro Tomiyasu, Oleksandr Zinchenko na William Saliba.
Arsenal iherutse gusinyisha myugariro Riccardo Calafiori
Ni nde uzinjiza igitego mu izamu rya Arsenal rizaba ririnzwe n'ubwugarizi bwa Williams Saliba, Ben White na Riccardo Calafiori
TANGA IGITECYEREZO