Copa America 2024: Byinshi ku itsinda A ririmo Lionel Messi

Itsinda A muri Copa America 2024, ni itsinda ryo kwitega cyane, kubera ko harimo Argentina ya Lionel Messi, ikaba izahangana n'ibihugu nka Canada, Chile na Peru.

1. Argentina

Kipe y'igihugu ya Argentina, ni ubukombe mu gutwara iki gikombe cya Copa America, kubera ko yacyegukanye inshuro 14. Muri izo nshuro, yacyegukanye mu 1921, 1925, 1927, 1929, 1937, 1941, 1945, 1946, 1947, 1955, 1959, 1991, 1993, na 2021.

Iyi Argentina itozwa na Lionel Scaloni, mu nshuro 14 zose yegukanye Copa America, inshuro imwe gusa nibwo yayitwaye iri kumwe na Lionel Messi, umukinnyi umaze kwegukana Ballon d'Or umunani.

Muri Copa America 2024, Argentina niyo ihabwa amahirwe menshi yo kwegukana iki gikombe, kubera ko ibikombe bibiri iki gihugu giheruka kwitabira, byombi cyarabitwaye. Ibyo ni Copa America yakinywe muri 2021 n'igikombe cy'Isi cyabereye muri Quatar 2022.

Argentina kandi, ihanzwe amaso yo na Kapiteni wayo,Lionel Messi, kuko ni umukinnyi w'imyaka 36 y'amavuko, iri rushanwa rikaba riri mu yanyuma ari gukinira iki gihugu.

Abakinnyi batatu bo kwitega mu ikipe y'igihugu ya Argentina ni Lionel Messi, Alexis Mac Allister na Alejandro Garnacho.

2. Peru

Ikipe y'igihugu ya Peru, nubwo iri mu itsinda rimwe na Argentina ya Lionel Messi, si igihugu cyo kwitega cyane kubera ko umupira waho wasubiye inyuma.

Nubwo Peru umupira waho wasubiye inyuma, ni igihugu cyo kubahwa muri iri rushanwa, kubera ko yegukanye iki gikombe inshuro ebyiri, mu 1939 na 1975.

Muri Copa America 2024 izabera muri Leta Zunze Ubumwe za Amerika, Peru izaba irangajwe imbere n'umutoza wayo Jorge Fossati.

Abakinnyi batatu bo kwitega mu ikipe y'igihugu ya Peru ni Pedro Gallese, Luis Advíncula, Gianluca Lapadula.

3. Chile

Ikipe y'igihugu ya Chile, nayo ni ikipe yo kwitega mu itsinda A, kubera ko mu myaka ya vuba yakoze byinshi bidasanzwe, yegukana Copa America inshuro ebyiri.

Muri Copa America, Chile ni igihugu gikunze kwihagararaho cyane imbere y'ikipe y'igihugu ya Argentina, cyane ko muri 2015 na 2016 iki gihugu cyatwaye Copa America inshuro ebyiri gitsinze Argentina ku mukino wa nyuma.

Copa America ya 2015 na 2016, nizo rukumbi iki gihugu gifite, cyane ko hafi y'abakinnyi bafashije iyi kipe gutwara iki gikombe ikibafite.

Muri Leta Zunze Ubumwe za Amerika, Chile izaba iyoboye n'umutoza Ricardo Gareca.

Bamwe mu bakinnyi bayo bo kwitega muri Copa America ni umuzamu Claudio Bravo, Alexis Sánchez, Ben Brereton.

Chile ni kimwe mu bihugu bizakina iri rushanwa gifite abakinnyi bakuze cyane, kubera ko umuzamu wabo Claudio Bravo amaze kugira imyaka 41 y'amavuko, rutahizamu Alexis Sanchez akaba afite imyaka 35 y'amavuko,  myugariro Gray Medel afite imyaka 36 y'amavuko, Arturo Vidal ukina mu kibuga hagati afite imyaka 36 y'amavuko.

Kuva Chile ifite abakinnyi biganjemo abakuze cyane, bitera impungenge ku hazaza h'ikipe y'igihugu ya Chile, kubera ko nta bakinnyi bato bakomeye bari kuzamuka ngo bazayifashe mu gihe kizaza.

4. Canada

Ikipe y'igihugu ya Canada, nayo iri mu itsinda ririmo Argentina, Chile na Peru, gusa niyo kana muri iri tsinda, kubera ko yo itazi uburyohe bw'iki gikombe.

Nubwo Canada nta gikombe ifite, umupira wayo uri gutera imbere cyane muri iyi myaka, cyane ko n'abakinnyi bayo basigaye bakinira amakipe akomeye i Burayi.

Canada niyo ihabwa amahirwe yo kuzamukana na Argentina mu itsinda A, ikipe Izaba iri gutozwa na Jesse Marsch.

Abakinnyi batatu bo kwitega mu ikipe y'igihugu ya Canada ni Alphonso Davies, Tajon Buchanan na Jonathan David.