Addax SC ya Juvenal iri mu mazi abira, imikino y’icyiciro cya kabiri igeze ahakomeye

Mu mpere z'iki cyumweru dusoje hakinwaga imikino y'umunsi wa 24 mu itsinda rya A na 23 mu itsinda rya B, Rutsiro FC iri mu itsinda rya A ikaba ari nayo iriyoboye ntabwo yakinnye kubera ko UR FC bari guhura ubu iri gukina imikino ya za Kaminuza. 

N’ubwo Rutsiro FC itakinnye ikipe ya Addax SC iri ku mwanya wa gatatu yanganyije na Tsinda Batsinde Igitego 1-1 ibi byatumye iyi kipe yo mu Ntara y'i Burengerazuba ihita irusha Intare FC ya Kabiri amanota 4 na Addax SC ya gatatu amanota 7 Kandi hasigaye imikino ibiri gusa.

Vision FC y'umutoza Muvunyi Fils iri mu itsinda rya B yabonye itike nyuma yo kunyagira Akagera FC iwayo ibitego 4-0, mbere y'umukino wa 23 Vision FC yagiye gukina iri ku mwanya wa mbere n'amanota 56, Espoir FC iri ku mwanya wa kabiri n'amanota 54 mu gihe AS Muhanga yari ku mwanya wa gatatu n'amanota 51.

Gusa amahirwe yo gukomeza mu cyiciro gikurikira Vision FC ikinira ku Mumena yayahawe na AS Muhanga yanganyije na Miroplast FC 0-0 mu mukino wabereye kuri Sitade ya kwa Mironko.

Itegeko rivuga ko uyu mwaka w'imikino wa 2023-24 muri shampiyona y'icyiciro cya kabiri amakipe 2 ya mbere muri buri tsinda azahita abona itike ya kamampaka (Playoffs) Aho kuba amakipe ane muri buri tsinda nk'uko byari bisanzwe umwaka ushize w'imikino.

Uko imikino yose y'umunsi wa 24 mu itsinda rya A na 23 mu itsinda rya B yagenze.

Umwe mu bashinzwe amarushanwa muri FERWAFA yatangarije InyaRwanda uko amakipe ane azabona itike y'Imikino ya Kamampaka azakina n'igihe imikino izabera. Yagize ati: "Amakipe ane azabona itike ya kamampaka azakina Shampiyona nto (Min-Championat) hanyuma buri kipe ihura n'indi imikino ibanza n'iyo kwishyura"

Yakomeje agira ati: "Shampiyona nimara kurangira tuzagirana inama n'amakipe yabonye itike dupange neza Ingengabihe y'imikino gusa nka FERWAFA turifuza ko hagati ya 22-25 Gicurasi 2024 imikino y'aba itangiye ku buryo hagati mu kwezi kwa Kamena imikino y'aba irangiye."

Uko amakipe akurikirana ku rutonde rwa Shampiyona nyuma y'umukino w'umunsi wa 24 mu itsinda rya A na 23 mu itsinda rya B

Bwa mbere mu mwaka w'imikino wa 2023-24 muri shampiyona y'icyiciro cya kabiri hagiye kuboneka amakipe amanuka mu cyiciro cya gatatu, uyu mwaka ikipe ya nyuma muri buri tsinda izahita Imanuka mu cyiciro cya gatatu. 

Kugira ngo ikipe ya Addax SC ibone umwanya wo gukina imikino ya kamarampaka, birasaba ko ikipe ya Intare FC ibona amanota ari munsi ya 5 mu mikino 2 isigaye, ubundi Addax SC igatsinda imikino yayo yose ifite.

Tariki ya 4 Ugushyingo 2023 ni bwo shampiyona yatangiye biteganyijwe ko izasozwa ku ya 19 Gicurasi 2024, mu gihe amakipe 28 agabajemo amatsinda 2 ari iyo yatangiye shampiyona ariko The Winners yari mu itsinda rya B yikuye muri shampiyona, tubibutse ko umwaka ushize Amagaju FC na Etoile de L'Est ari zo zazamutse mu cyiciro cya mbere.

Ikipe imwe muri buri tsinda niyo izamanuka mu cyiciro cya gatatu

Ikipe ya Rutsiro FC iheruka mu cyiciro cya mbere yabonye itike ya kamarampaka

Vision FC nayo yabonye itike ya kamarampaka

Addax SC na Intare nizo kipe zizavamo ikipe iherekeza Rutsiro mu Itsinda rya mbere

Muhanga isigaje umukino umwe, kandi Espoir FC iyiri imbere irayirusha amanota 2 ikaba isigaje imikino 2

Graphics: Eric Munyantore - InyaRwanda