Ahabanza Imikino

Umunsi wa 27 wa Shampiyona y'u Rwanda ushobora gusiga Igikombe kibonye nyiracyo

Yanditswe na: ISHIMWE Walter
Taliki:19/04/2024 11:20 0

Kuri uyu wa Gatanu nibwo imikino ya Shampiyona y'u Rwanda umunsi wa 27 iza gukomeza. Umunsi wa 27 ushobora gusiga APR FC itwaye igikombe, mu gihe itatakaza umukino ifitanye na Kiyovu Sports

Kuri uyu wa Gatanu Gasogi United irakira Sunrise kuri Kigali Pele Stadium, umukino ubimburira indi y'umunsi wa 27 wa Shampiyona y'u Rwanda, Primus Premier League.

Umukino wa Sunrise na Gasogi United, ufite ibisobanuro byinshi cyane cyane kuri Sunrise kubera ko niramuka itakaje uyu mukino, birayongerera ibyago byinshi byo kumanuka mu cyiciro cya Kabiri.

Nubwo Sunrise iri ku mwanya wa 14 n'amanota 26 irarusha inota rimwe Bugesera ya 15 n'amanota 25.

Mu gihe Sunrise yatsindwa umukino wa Gasogi United, Bugesera igatsinda umukino ifitanye na Rayon Sports, Bugesera yahita igira amanota 28 maze Sunrise igasigara ku manota 26.

Gasogi United iza kwakira Sunrise nayo nta gahunda yo gutakaza umukino ifite kuri uyu wa Gatanu, kubera ko iracyafite amanota 29. Bivuze ko iramutse itsinze umukino ifitanye na Sunrise kuri uyu wa Gatanu, yahita igira amanota 32 ikizera umutekano uhoraho mu mikino itatu yaba isigaye kugira ngo Shampiyona irangire.

Kuri uyu munsi wa 27 wa Shampiyona y'u Rwanda, hategerejwe umukino uzahuza APR FC na Kiyovu Sports, kubera ko ushobora kurangira ushize umucyo ku gikombe.

APR FC birayisaba inota rimwe gusa, kugira ngo yizere Burundu igikombe cya Shampiyona. APR FC iri ku mwanya wa mbere n'amanota 60 ikurikiwe na Rayon Sports ifite amanota 48.

Rayon Sports iramutse itsinze imikino ine isigaje, ntabwo yaca kuri APR kuko zombi zahita zinganya amanota 60. Bisobanuye ko APR FC ibura inota rimwe gusa ngo ihite igira amanota arenze 60, kubera ko iminsi isigaye, nta yindi kipe izarenza amanota 60 ukurikije uko ahagaze kugeza ubu.

APR FC ishobora kungukira ku mukino wa Rayon Sports na Bugesera FC. Bugesera izamanuka mu kibuga ku munsi wa 27 wa Shampiyona y'u Rwanda yakaniye, kubera ko iri kurwana no kutamanuka mu cyiciro cya kabiri. Mu gihe Bugesera yakoma mu nkokora Rayon Sports bikanganya cyangwa ikayitsinda, APR yaba ibonye amahirwe yo kwegukana igikombe ku manota 60.