Ahabanza Imyidagaduro

Kate Bashabe yibiye ibanga abana ryabafasha kwesa imihigo

Yanditswe na: Abitije Seraphin Elise
Taliki:8/01/2024 19:47 0

Kate Bashabe yagaragaje ko uburezi ari akabando k’iminsi kandi ko abana bakiri mu mashuri bakwiye kuzirikana ko aribo ejo hazaza, yibutsa abakobwa ko ahazaza heza umuntu ari we uhategura akahakorera nkunganire ikaza nyuma.

Ku wa 06 Mutarama 2024 mu Karere ka Bugesera mu Murenge wa Rweru ku Rwunge rw’Amashuri rwa Nkanga, Kate Bashabe yatanze ibikoresho by’ishuri ku bana 660.

Iki kikaba ataricyo gikorwa cya mbere akoze cyo gufasha kuko mu myaka inyuranye yagiye abikora yaba gufasha abanyeshuri baturuka mu miryango itishoboye no gutangira ubwisungane mu kwivuza abantu batandukanye.

Asobanura impamvu ibimutera dore ko yanashimangiye ko abironkeramo imigisha myinshi, yavuze ko byose abikesha uko yarezwe ati”Ndashima Mama ni na we wantoje umutima w’urukundo watumye dukora igikorwa cy’uyu munsi.”

Uyu mushabitsi wabigize umwuga wananyuze mu marushanwa y’ubwiza aho yabaye Miss MTN 2010,yibukije abanyeshuri ko ari igihugu gihanze amaso kandi ko ibyo bifuza bazabigeraho babikesheje kwiga bashyizeho umwete.

Ati”U Rwanda nimwe ruhanze amaso, nimwe Rwanda rw’ejo, nimwe muzavamo abayobozi, nimwe muzavamo abashoramari nimwe muzavamo abantu bakomeye abaganga ariko byose bizaba ari uko mwashyize umwete mu kwiga.”

Ku birebana n’ubutumwa bwihariye yageneye urubyiruko byumwihariko rw’abakobwa dore ko rwinshi rumufatiraho icyitegererezo. Yagize ati”Ni ukwigirira icyizere guharanira ejo hazaza heza.”

Akomeza agira ati”Bivuga ko niba ari abakiri mu ishuri bagomba kwiga cyane, abatangira ubucuruzi cyangwa gukora bagashyiramo imbaraga ntibakemere ubaca intege kuko burya ahazaza heza ni umuntu uhigezaho n’abantu bamuri iruhande.”

Iki gikorwa yakoze kikaba cyaratewe inkunga n’Akarere ka Bugesera, Rahura, Sawa Citi, Bralirwa n’abandi banyuranye. Cyitabiriwe n’abayobozi mu nzego zitandukanye barimo Meya wa Bugesera Mutabazi Richard.

Hari abantu bo mu nzego z’umutekano batandukanye zirimo iza gisirikare na polisi n’abahanzi Christopher Muneza na Bruce Melodie basusurukije abari aho, banabakangurira gushyikira uburezi no kugira umutima wo gufasha.Hatanzwe ibikoresho bitandukanye by'ishuri ibyishimo bitaha ababyeyi n'abana bashimira Kate Bashabe wabatekereje abinyujije mu muryango yatangije wa Kabash CaresKate Bashabe yibukije abana ko bafite inshingano yo kwiga bashyizeho umwete kuko aribo u Rwanda ruhanze amaso,ashimira abaje kumushyigikira barimo n'abahanziKate Bashabe yavuze ko gufasha abikomora kuri Mama we na Nyirakuru yakuze abona babikora akabitora atyoMeya w'Akarere ka Bugesera yashimiye Kate Bashabe asaba abana gukoresha neza ibikoresho bahawe