Ntimukajye mukina imikino y’abana - Yago atarya indimi yakije umuriro kuri Chriss Eazy na Junior Giti

Yago yavuze ibi ubwo yagarukaga ku myitwarire yerekanye nk’idahwitse ya Christian Rukundo Nsengimana [Chriss Eazy] wari wemeye kuza kuririmba mu gitaramo cye bikarangira ataje n'abareberera inyungu ze barangajwe imbere na Bugingo Bony [Junior Giti] nabo ntibahakandagire.

Mu ijoro ryo kuri uyu wa 22 Ukuboza 2023 muri Camp Kigali [KCEV] habereye igitaramo cyo kumurika umuzingo wa mbere wa Yago, gusa abahanzi bari bateganijwe bose ntibabashije kuririmba.

Abo bahanzi barimo Levixone wo muri Uganda wagize ikibazo cy’indege na Chriss Eazy utaje gutaramira abari bateraniye mu ihema ryari ryarimbishirijwe kwakira iki gitaramo n’abahanga bamaze kwamamara muri uyu mwuga bazwi nka Gorilla Events Ltd.

Yago agaruka kuri Chriss Eazy mu buryo bwihariye yagize ati”Ikintu nababwira niba wemeye gushyigikira umuntu mushyigikire, abo bajene barangoye, gutegura igitaramo ntabwo biba byoroshye, bavandimwe ntabwo nzi indirimbo za we zakunzwe [hit] ku buryo wanyima akaboko.”

Uyu muhanzi wamuritse Album yise  ‘Suwejo’ yakomeje avuga uko yamenye ko Eazy atazaza, agira ati”Sinzi nta mafaranga nabahaye narabivuze, ejo Junior yari yambwiye ngo ntabwo bazaza ngira ngo bari gukina yarabinyandikiye nkagira ngo ari kubeshya.”

Ashimangira iyi ngingo agira ati”Izo hit bari gukora zishobora gutuma badatanga akaboko kuri bagenzi babo kabisa njye ntabwo nzi kurya indimi, sinzi no kubeshya, niba wemeye kuza kuri ‘affiche’ ukemera kuririmba mu gitaramo cya Yago, Juno, Bruce Melodie, Meddy, bikore.”

Yongeraho ati”Ntimukazajye mukina, urashaka ko umuntu akwinginga ngo wampaye amashusho yo kwamamaza igitaramo. Niba ushyigikiye umuntu mushyigikire.

None umuntu araguha amashusho yo kwamamaza igitaramo ku munsi wacyo yibeshye n'itariki noneho ibaze kugira ngo umunyamuziki mugenzi wanjye abe atazi umunsi mfitiye igitaramo.”

Yago yagaragazaga ko bitumvikana kuba Chriss Eazy yaba azaririmba mu gitaramo akaba atazi igihe kizabera anavuga ku buryo byagoranye gukorana n’uyu muhanzi.

Turacyashaka amakuru yimbitse ku cyatumye Chriss Eazy atitabira igitaramo cya Yago.

Yago Pon Dat yagaragaje ko atishimiye imyitwarire y'abahanzi badashyigikirana cyangwa badasohoza ibyo biyemejeYago yavuze ko atumva indirimbo zabiciye bigacika Chriss Eazy yakoze zatuma amubeshya Yagaragaje ko atishimiye imyitwarire ya Chriss Eazy na Junior Giti hatazwi impamvu yatumye batagaragara mu gitaramo bari biyemeje gushyigikira