Manchester United iri mu mazi abira! Imikino ya UEFA Champions League yagarutse

Guhera kuri uyu  kwa Kabiri nibwo iyi mikino ihuza amakipe yitwaye neza iwayo ku Mugabane w'u Burayi iraba yagarutse.

Duhereye mu itsinda A, saa yine z'ijoro ikipe ya FC Copenhagen iraba yakiriye Galatasaray naho Manchester United yakiriye FC Bayern Munich.

Muri iri tsinda FC Bayern Munich niyo yamaze gukatisha itike ya 1/8 yonyine n'amanota 13 naho izindi zose biracyashoboka ko zayibona gusa iyo bigoranye ni Manchester United kubera ko irasabwa gutsinda uyu mukino igahita igira amanota 7 ubundi FC Copenhagen na Galatasaray zikanganya ku buryo zihita zigira amanota 6 kuko ubu zifite amanota 5.

Mu itsinda B,saa moya n'iminota 45 ikipe ya PSV Eindhoven irakira Arsenal naho ikipe ya Lens yakire Sevilla. Hano ho ukuntu bimeze Arsenal yamaze gukatisha ndetse iyiboye urutonde n'amanota 12 mu gihe PSV Eindhoven ari iya 2 n'amanota 8,Lens ikaba iya 3 n'amanota 5 naho Sevilla yo ikaba iyanyuma n'amanota 2.

Mu itsinda C saa yine Napoli irakira SC Braga naho Union Berlin yakire Real Madrid. Muri iri tsinda Real Madrid yamaze kubona itike naho Napoli yo irasabwa kunganya na SC Braga kugira ngo izerekeze muri 1/8.

Saa yine z'ijoro kandi mu itsinda D FC Salzburg irakira Benfica naho Inter Milan yakire Real Sociedad. Hano ho byamaze kurangira Real Sociedad na Inter Milan zakatishije itike.

Ku munsi w'ejo ku wa Gatatu nabwo imikino ya Champions League izakomeza, mu itsinda E ikipe ya Atletico Madrid izaba yakiriye Lazio naho Celtic yakire Feyenoord.Muri iri tsinda naho byarangiye Atletico Madrid na Lazio zamaze kugera muri 1/8.

Mu itsinda ry'urupfu F naho bazaba bakina saa yine z'ijoro, Borussia Dortmund izaba yakiriye Paris Saint-Germain naho Newcastle United yakire AC Milan.

Kuri ubu ikipe ya Borussia Dortmund niyo yamaze gukatisha ndetse niyo iyoboye n'amanota 10 naho Paris Saint-Germain ya kabiri n'amanota 7 irasabwa kuzatsinda kugira ngo yizere gukatisha. 

Mu gihe itatsinda, AC Milan cyangwa Newcastle United zizaba ziri gukina ndetse zikaba zinganya n'amanota 5 ,hakagira itsinda indi niyo izahita ikomeza muri 1/8.

Mu itsinda G,saa moya n'iminota 45 FK Crvena Zvezda izaba yakiriye Manchester City naho RB Leipzig yo yakire Young Boys. Muri iri tsinda Manchester City na RB Leipzig zamaze gukatisha.

Mu itsinda H ,saa yine z'ijoro FC Porto izakira Shakhtar Donetsk naho Royal Antwerp yakire FC Barcelona. 

Aha uko bimeze FC Barcelona yakatishije naho Shakhtar Donetsk na FC Porto zinganya amanota 9 ,ubwo izatsinda indi izahita ikomeza cyangwa nizinganya FC Porto ikomeze bitewe nuko izigamye ibitego byinshi.

Ikipe ya Manchester United niyo ihanzwe amaso cyane muri iri joro

Mu mukino ubanza na FC Bayern Munich, Manchester United yatsinzwe ibitego 4-3